იუსტიციის მინისტრმა რატი ბრეგაძემ პარლამენტში ინტერპელაციის წესით დასმულ კითხვას უპასუხა. მინისტრის თქმით, სწორედ ადამიანის უფლებებზე მორგებული ცვლილებების შედეგია მსჯავრდებულებისთვის სატელეფონო საუბრების ლიმიტების შესახებ შესული ცვლილებები.
„სატელეფონო საუბრის დროის ლიმიტები, რომლებიც პატიმრებს აქვთ, სახალხო დამცველის, სპეციალური საგამოძიებო სამსახურის და საქართველოს იუსტიციის სამინისტროს გენერალური ინსპექციის ცხელ ხაზზე დაკავშირების შემთხვევებზე არ ვრცელდება. განსხვავებით თქვენი პერიოდისგან, ყველა ეს ზარი სახელმწიფოს მიერ ანაზღაურდება და ეს არის ნათელი დადასტურება იმისა, რომ სახელმწიფო, პირველ რიგში, დაინტერესებულია ადამიანის უფლებების დაცვით", - განაცხადა რატი ბრეგაძემ.
იუსტიციის მინისტრმა, ასევე, მსჯავრდებულთა უფლებების დაცვის კუთხით იუსტიციის სამინისტროს ახალ ინიციატივაზე ისაუბრა, რომელიც, მსჯავრდებულსა და უფლებადამცველებს შორის ფაქტობრივად, შეუზღუდავ კავშირს უზრუნველყოფს. აღნიშნული პროგრამა ამჟამად სასჯელაღსრულების №8 დაწესებულებაში საპილოტე რეჟიმში მიმდინარეობს.
„ინიციატივის განხორციელების შედეგად პატიმარს ადვოკატთა ასოციაციასა და იურიდიული დახმარების სამსახურთან შეუზღუდავად დაკავშირება შეეძლება. აქვე, საპროცესო უფლებებთან დაკავშირებით, შემიძლია გითხრათ, რომ საპილოტე რეჟიმში №8 დაწესებულებაში სპეციალური პროგრამა უკვე დაინერგა, რომლის მიხედვითაც ადვოკატებს შესაძლებლობა აქვთ, თავიანთი ვიზიტები ონლაინ დაჯავშნონ, დაზოგონ დრო და დაცვის უფლება უფრო ეფექტიანად იყოს რეალიზებული", - განაცხადა რატი ბრეგაძემ.