თქვენს ტვინში ჩაიხედეთ, იქნებ თქვენს ტვინში არის რეალური პრობლემები, - ამის შესახებ პრემიერ-მინისტრმა ირაკლი ღარიბაშვილმა "ლელოს" დეპუტატის ანა ნაცვლიშვილის მისამართით განაცხადა.

პრემიერმა გაიხსენა ანა ნაცვლიშვილის მანამდე გაკეთებული განცხადება, სადაც ოპოზიციონერმა დეპუტატმა ხელისუფლებას მიმართა:"თავს ნუ დაიმშვიდებთ იმით, რომ ასეთი ფაქტები,“შავი ხვრელი“ არ არსებობს, თუ ასეთი ფაქტი დაფიქსირდა, მერწმუნეთ, აქედან სახლში არა, ცუდ ადგილას წახვალთ".

„გამოდის ქალბატონი ნაცვლიშვილი, არ ვიცი როგორ მოგმართოთ, ყოველგვარი დასაბუთების გარეშე, ყოველგვარი ფაქტის, მტკიცებულების გარეშე საუბრობს, რომ შავი ხვრელი არსებობსო. არ ვიცი, რა უნდა გიპასუხოთ ახლა. ან არ გესმით, ან არ გინდათ, რომ გაიგოთ, ან თქვენს ტვინში ჩაიხედეთ, იქნებ თქვენს ტვინში არის რეალური პრობლემები. არ ვიცი, რა გიპასუხოთ ამაზე", - განაცხადა ნაცვლიშვილის მისამართით პრემიერმა.