„სტრატეგია აღმაშენებლის“ დეპუტატები საქართველოს დამოუკიდებლობის აღდგენის აქტის მიმღებ პირთათვის სახელმწიფო კომპენსაციის ოდენობის გაზრდის ინიციატივით გამოდიან

„სტრატეგია აღმაშენებლის“ დეპუტატები 1991 წლის 9 აპრილს საქართველოს დამოუკიდებლობის აღდგენის აქტის მიმღებ პირთათვის სახელმწიფო კომპენსაციის ოდენობის გაზრდის ინიციატივით გამოდიან.

გიორგი ვაშაძემ და პაატა მანჯგალაძემ კანონის პროექტი მოამზადეს, რომლის მიხედვით, 1990 წელს არჩეული ყოფილი უზენაესი საბჭოს იმ წევრებისთვის, რომლებმაც კენჭისყრისას მხარი დაუჭირეს და 1991 წლის 9 აპრილის საქართველოს სახელმწიფოებრივი დამოუკიდებლობის აღდგენის აქტს ხელი მოაწერეს, სახელმწიფო კომპენსაციის გაზრდილი ოდენობა დგინდება და იგი მოქმედი პარლამენტის წევრის ხელფასის ნახევრით განისაზღვრება.

მოქმედი ნორმის მიხედვით, ყოფილი უზენაესი საბჭოს წევრის სახელმწიფო კომპენსაციის ოდენობა პარლამენტის მოქმედი წევრის ხელფასის ერთ მესამედს შეადგენს. ამასთან, კანონში არსებული დათქმის გათვალისწინებით, კომპენსაციის ოდენობა, კანონით დადგენილი გამონაკლისის გარდა, 560 ლარს არ უნდა აღემატებოდეს.

პარლამენტის რეგლამენტით, დეპუტატის გასამრჯელო, თუ ის პარლამენტის თანამდებობის პირი არ არის, 4 624 ლარს შეადგენს. აღნიშნულის გათვალისწინებით კი, ყოფილი უზენაესი საბჭოს წევრთათვის სახელმწიფო კომპენსაციის ოდენობა 1 752 ლარით გაიზრდება.

არსებული მონაცემების მიხედვით, 1990 წელს არჩეული ყოფილი უზენაესი საბჭოს იმ წევრთა რაოდენობა, რომლებმაც კენჭისყრისას მხარი დაუჭირეს საქართველოს სახელმწიფოებრივი დამოუკიდებლობის აღდგენის აქტს, დღეის მდგომარეობით დაახლოებით 165 პირია.

“1991 წლის 9 აპრილის საქართველოს სახელმწიფოებრივი დამოუკიდებლობის აღდგენის აქტის მიღება საქართველოს მრავალსაუკუნოვანი ისტორიის მანძილზე ერთ-ერთი გამორჩეული ეტაპია. აღნიშნული აქტის მიღებამ ქართველი ხალხის მრავალსაუკუნოვანი ოცნება რეალობად აქცია და ახალი დამოუკიდებელი და დემოკრატიული ქვეყნის მშენებლობას დაუდო საფუძველი. განსაკუთრებულ პატივისცემას და მათი ღვაწლის სათანადო დაფასებას იმსახურებს ხალხი, ვინც აღნიშნული აქტის მიღების მართლაც ისტორიული პროცესის სათავეში იდგა.

საქართველოს სახელმწიფოებრივი დამოუკიდებლობის აღდგენის აქტის მიღება 1990 წლის 28 ოქტომბრის მოწვევის უზენაესი საბჭოს წევრთა უმრავლესობის ძალისხმევით განხორციელდა. შესაბამისად, მნიშვნელოვანია სახელმწიფოს მხრიდან განსაკუთრებული ყურადღება დაეთმოს იმ პირებს, რომლებმაც თავიანთი მოღვაწეობითა და მიღებული გადაწყვეტილებით რეალობად აქციეს ქვეყნის დამოუკიდებლობისათვის ბრძოლა და ჯერ კიდევ საბჭოთა კავშირის არსებობის პირობებში უზრუნველყვეს ქვეყნის დამოუკიდებლობის აღდგენა“, - ნათქვამია პროექტის განმარტებით ბარათში.

კანონპროექტი პარლამენტს ბიუროს უახლოეს სხდომაზე წარედგინება.

თენგიზ ფხალაძე - დღეს თამაშის დრო ნამდვილად არ არის, 12-ვე ვალდებულება უნდა შესრულდეს და არა შესრულების ილუზია შეიქმნას, კანდიდატობის ვერ მიღება მხოლოდ ჩვენს თავს უნდა დავაბრალოთ და სხვას არავის
ქეთევან ჩაჩავა - აუცილებელია ყველაფერი გაკეთდეს, რომ საქართველომ ევროკავშირის კანდიდატობის სტატუსის მისაღებად წლის ბოლომდე „მეორე შანსი“ გამოიყენოს
ქართული პრესის მიმოხილვა 24.06.2022
უკრაინის დამოუკიდებელი ანტიკორუფციული კომისიის აღმასრულებელი დირექტორი - დრო ჩვენთვის სიცოცხლით იზომება, ჩვენ არც თუ ისე ტოლერანტულები ვართ ლოდინისადმი - ამ დროში ვკარგავთ ქვეყანას, რომელსაც რუსეთი წამებით კლავს
მცირე სახელმწიფო „ახალი წესრიგის“ კონტექსტში: ქართული ქეისი
Hotsale.ge-ის სპონსორობით საქართველოში პირველი ფინანსური ბიზნეს ფორუმი გაიმართა
დედაქალაქის ცენტრალურ გამზირზე მდებარე, საუკუნეზე მეტი ისტორიის მქონე სასტუმრო „თბილისი მარიოტი“ ბაზარზე სრულიად ახალი პროდუქტით - „პარკ გრილ“ რესტორნით შემოდის
ბოკერიას სახელობის საუნივერსიტეტო ჰოსპიტლსა და „ლიბერთი ბანკს“ შორის მემორანდუმი გაფორმდა