ცენტრ „ემპათიას“ ხელმძღვანელი მარიამ ჯიშკარიანი ჯანდაცვის სამინისტროს რეგულირების სააგენტოს მიმართავს, დროულად მიაწოდის უცხოელი ექსპერტის ლიცენზიის აღიარება და ხელოვნურად ნუ აჭიანურებს პროცესს.

როგორც ჯიშკარიანმა “ვივამედში“ საქართველოს მესამე პრეზიდენტის მიხეილ სააკაშვილის მონახულებამდე განაცხადა, არ გამოვრიცხავს სხვა საერთაშორისო ექსპერტის მოწვევასაც.

მისი თქმით, ექსპერტების დასკვნა რაც შეიძლება მოკლე ხანში იქნება.

“მინდა მივმართო ჯანდაცვის სამინისტროს რეგულირების სააგენტოს, დროულად მოგვაწოდოს უცხოელი ექსპერტის ლიცენზიის აღიარება და ხელოვნურად ნუ აჭიანურებს პროცესს. არ გამოვრიცხავ სხვა საერთაშორისო ექსპერტის მოწვევასაც, ვინაიდან ჩვენ მიერ შესწავლილი დოკუმენტაციით მიმდინარეობს მხოლოდ სიმპტომური მკურნალობა. შესაბამისად, ჩვენ ვეცდებით დასკვნა იყოს სწრაფად, თუმცა დოკუმენტაცია მოცულობითია და არგუმენტაციისთვის გვჭირდება სხვადასხვა ექსპერტ-სპეციალისტების დასკვნები. აქედან გამომდინარე შევჯერდებით და დასკვნა იქნება, რაც შეიძლება მოკლე ხანში”,- განაცხადა ჯიშკარიანმა.

მისი განცხადებით, ამ პერიოდში მიმდინარე მკურნალობა შეიძლება შეფასდეს, როგორც არაადეკვატური.

“მკურნალობა მიმდინარეობს სიმპტომურად. მთელი პენიტენციური სამსახურის სამედიცინო მკურნალობა და ამ პერიოდში მიმდინარე მკურნალობა შეიძლება შეფასდეს, როგორც არაადეკვატური, ეს არის მხოლოდ სიმპტომური მკურნალობა. შესაბამისად, დასკვნა იქნება სერიოზული, არგუმენტირებული. ყველა ის დიაგნოზი, რომელიც ცენტრ “ემპათიას” დასმული აქვს დეკემბერში რელევანტურია. დაემატება სხვა ნიუანსები და არგუმენტაცია, შემდეგ კი წარიმართება სასამართლოში”,- განაცხადა ჯიშკარიანმა.