გამოიკვეთა ტენდენცია, რომ ქვეყნის პოლიტიკური ცხოვრება ქუჩიდან მოძახილი მოწოდებებით იმართოს, რაც არასწორია, - ასეთია პარლამენტის ვიცე-სპიკერის დავით სერგეენკოს პოზიცია 16, 18 და 20 ივნისის დაგეგმილ აქციებთან დაკავშირებით.

„ნებისმიერ ადამიანს აქვს საკუთარი პოზიციის გამოხატვის უფლება და ამას ვერავის ავუკრძალავ, მაგრამ ღრმად მჯერა, რომ ასეთ საკითხებზე მსჯელობა და გადაწყვეტილებების მიღება პოლიტიკურ ინსტიტუციებში უნდა იყოს და არა ქუჩაში. უკვე მართლა ზედმეტია, რაც ხდება - არის მცდელობა, რომ ქვეყნის პოლიტიკური ცხოვრება, რომელიც პოლიტიკურმა ინსტიტუციებმა საზოგადოებასთან ანგარიშგებით უნდა გადაწყვიტოს, ქუჩაში უნდა გადაწყდეს, რაც ცალსახად არასწორი მგონია", - განაცხადა დავით სერგეენკომ.

რაც შეეხება საქართველოსთვის ევროკავშირის წევრობის კანდიდატის სტატუსის მიღებას და მასთან დაკავშირებულ მილოდინებს, სერგეენკოს თქმით, მისი მოლოდინი ცალსახად პოზიტიურია და „სხვაგვარად არც შეიძლება იყოს".

სერგეენკომ ასევე აღნიშნა, რომ „იმაზე აქცენტირება, თუ კანდიდატის სტატუსს უახლოეს დღეებში ვერ მივიღებთ, ეს ხელისუფლების პასუხისმგებლობაა, არასწორი ფორმულირებაა".

„ეს არის ჩვენი არჩევანი და ამ გზაზე უნდა ვიაროთ. სტატუსთან დაკავშირებით მოლოდინი პოზიტიური მაქვს, მაგრამ თუკი რაიმე მიზეზით რაღაც სხვა გადაწყვეტილება იქნება მიღებული, არ ვუშვებ იმას, რომ ევროპული მიმართულებით სვლაზე ხელი უნდა ავიღოთ - არა, უფრო ინტენსიურად უნდა ვიაროთ", - განაცხადა დავით სერგეენკომ.

ცნობისთვის, საქართველოს პრეზიდენტმა სალომე ზურაბიშვილმა საქართველოს მოსახლეობას შესთავაზა, 16 ივნისს შეიკრიბონ ევროპის მოედნიდან რიყემდე, რათა „დავანახოთ ევროპას ჩვენი თავი, ჩვენი ერთობა". 20 ივნისს დაგეგმილია აქცია "შინ ევროპისკენ". დღეს კი „გირჩმა“ განაცხადა, რომ 18 ივნისს, დედაენის ბაღში შეიკრიბებიან.