თავდაცვისა და უშიშროების კომიტეტმა „საქართველოს დაზვერვის სამსახურის შესახებ" კანონში შესატან ცვლილებებზე იმსჯელა და მეორე მოსმენით მხარი დაუჭირა. ინფორმაციას ამის შესახებ საქართველოს პარლამენტი ავრცელებს.

დაზვერვის სამსახურის უფროსის პირველი მოადგილის, გიორგი ლილუაშვილის განცხადებით, კანონპროექტის მიღება განპირობებულია ეროვნული სადაზვერვო სისტემის და სადაზვერვო საქმიანობის დახვეწის, ასევე, ამ კანონის სხვა საკანონმდებლო აქტებთან შესაბამისობაში მოყვანის აუცილებლობით. კანონპროექტის მიღება საქართველოს დაზვერვის სამსახურის შემდგომ განვითარებას და კანონში არსებული სამართლებრივი ხარვეზების აღმოფხვრას ხელს შეუწყობს.

კანონპროექტის თანახმად, დაზვერვის სფეროში საერთაშორისო თანამშრომლობის საკითხებში საქართველოს პრემიერ-მინისტრის, როგორც დაზვერვის სისტემის ფუნქციონირებაზე სამსახურებრივი ზედამხედველობის განმახორციელებელი პირის, ჩართულობა გაიზრდება.

„სამსახურის უფროსი ვალდებული იქნება საქართველოს დაზვერვის სამსახურის მიერ გაწეული საქმიანობის შესახებ ყოველწლიური ანგარიში საქართველოს პრემიერ-მინისტრს წარუდგინოს. მოქმედი კანონმდებლობა ასეთ ვალდებულებას არ ითვალისწინებდა", -განაცხადა გიორგი ლილუაშვილმა.

მისი თქმით, სამსახურში მიღებული პირები გამოსაცდელი ვადით დაინიშნებიან და სპეციალური მომზადების კურსებისა თუ პროგრამის გავლას დაექვემდებარებიან. სამსახურის ოპერატიული და ანალიტიკური ფუნქციის განმახორციელებელ დანაყოფებში ხელმძღვანელ თანამდებობებზე დანიშვნა, აგრეთვე საქართველოს დიპლომატიურ წარმომადგენლობებში სამსახურის წარმომადგენლების მივლენა შესაძლებელი იქნება მხოლოდ საქართველოს დაზვერვის სამსახურში ოპერატიული ან/და ანალიტიკური ფუნქციის განმახორციელებელ დანაყოფებში მუშაობის არანაკლებ 2 წლიანი გამოცდილების შემთხვევაში.

„სამსახურს ელექტრონული დოკუმენტის შექმნის, ელექტრონული ხელმოწერისა და ელექტრონული სანდო მომსახურების გამოყენების უფლებამოსილება მიენიჭება, რაც სხვა საკანონმდებლო აქტებიდან გამომდინარე რეალურად ისედაც ხორციელდება ", - განაცხადა მომხსენებელმა.

დაზვერვის სამსახურის ოფიციალური წარმომადგენლების მივლინების ანაზღაურებისა და მატერიალურ-ტექნიკური უზრუნველყოფის საკითხების მომწესრიგებელი ნორმატიული აქტის გამოცემის მიზნით, შესაბამისი საკანონმდებლო საფუძველი შეიქმნება.

მოსაზრებების გამოთქმის შემდეგ დეპუტატებმა კანონპროექტის პლენარულ სხდომაზე გატანას მხარი დაუჭირეს.