პარტია "ლელოს" საგარეო მდივანი, გრიგოლ გეგელია, ბრიუსელში სამუშაო ვიზიტით მიემგზავრება, სადაც ის მონაწილეობას მიიღებს ევროპარლამენტის ჯგუფის, Renew Europe-ის, ღონისძიებაში აღმოსავლეთ პარტნიორობის შესახებ.
აღნიშნულ ინფორმაციას „ლელო“ ავრცელებს.
პარტიის ინფორმაციით, ბრიუსელში ვიზიტის ფარგლებში, გეგელია გამართავს შეხვედრებს ევროპარლამენტარებთან, ევროპული კომისიისა და ევროპული კავშირის საგარეო ქმედების სამსახურის წარმომადგენლებთან, ისევე როგორც უკრაინის და სხვა რეგიონალურ დელეგაციებთან.
გეგელიას თქმით, “ამ უაღრესად კრიტიკულ და ისტორიულ კვირაში, თითოეული ქართველი პოლიტიკოსისა და მოქალაქის უპირველესი ვალდებულებაა გაიღოს მაქსიმალური ძალისხმევა ქართველი ერის ევროპული არჩევანის გადასარჩენად“.
როგორც პარტიის მიერ გავრცელებულ ინფორმაციაშია ნათქვამი, ბრიუსელში გადაწყვეტილების მიმღებ პირებთან შეხვედრებისას, “ლელოს” სახელით კიდევ ერთხელ გაჟღერდება საქართველოსათვის კანდიდატის სტატუსის მიცემის მტკიცე მხარდაჭერა.
ამასთან, ორმხრივი შეხვედრებისას ასევე განხილული იქნება იმ რეფორმების დღის წესრიგი, რომლის გატარებაც მნიშვნელოვანია, ისევე როგორც ოპოზიციის სამოქმედო გეგმა.