რას უნდა აკეთებდეს ევროპის მოსურნე ხელისუფლება? - უნდა ცდილობდეს შეუერთდეს ხალხს და უთხრას: „ჩვენ თქვენთან ვართ”, უნდა გავიდნენ ხალხთან. სალომე ზურაბიშვილიც რომ იპრანჭება, მივიდეს ხალხთან , - ამის შესახებ „პალიტრანიუსის“ გადაცემა „360 გრადუსში“ ექსპერტმა, გია ხუხაშვილმა განაცხადა.

როგორც ხუხაშვილმა აღნიშნა, ქართველმა ხალხმა უნდა აიძულოს „ქართული ოცნება“, შეასრულოს საზოგადოების მოთხოვნები.

მისი თქმით, დღეს პარლამენტის შენობის წინ მიმდინარე აქციას, უნდა შეერთებოდნენ საქართველოს ხელისუფლების წარმომადგენლები და პრეზიდენტი სალომე ზურაბიშვილი.

„ხელისუფლების ბუნება იცით როგორია?! ისინი მოქმედებენ ცხოველური ინსტინქტებით, ყოველი დღის გადაგორებით, თვითგადარჩენის ინსტინქტით. პრობლემა გადააგორონ და მეორე დღეს ისევ იმ განუკითხაობაში არიან, რაშიც იყვნენ მანამდე, როგორც კი გადააგორებენ პრობლემას. ყოველდღიური დაპირების და „გადაგდების“ რეჟიმში არიან, ეს მოაზროვნე ადამიანისთვის არ არის დამახასიათებელი. მხოლოდ ინსტინქტებით მოქმედებენ და ეს სახიფათოა ქვეყნისთვის.

დღევანდელი დღე უნდა იქცეს ქართველი ხალხის და ქართული საზოგადოების გამოღვიძების დღედ. ასეთია პირდაპირი დემოკრატია, როდესაც დაქირავებული ხელისუფლება არ აკეთებს იმას, რასაც ხალხი ითხოვს, ხალხი ვალდებულია აიძულოს თავისი მსახური, რომ მისი დაკვეთა შეასრულებინოს. ამიტომ, იმის ილუზია ნუ გვექნება, რომ დღეს ხალხს დაინახავს ხელისუფლება და ისინი ჭკუაზე მოვლენ.

რას უნდა აკეთებდეს ევროპის მოსურნე ხელისუფლება?! - უნდა ცდილობდეს შეუერთდეს ხალხს და უთხრას, რომ „ჩვენ თქვენთან ვართ“. უნდა გავიდნენ ხალხთან. სალომე ზურაბიშვილიც რომ იპრანჭება, მივიდეს ხალხთან, რომ მოძღვრავს შორიდან, ბრიფინგებს რომ ატარებს, ალტერნატიული აქცია რომ დანიშნა და შერცხვა თვითონაც“, - განაცხადა გია ხუხაშვილმა.