ევროკავშირშიც თუ გინდათ და ბიძინას გადარჩენაც, მოიკითხეთ ის კაცი - მის გამო და მის თაობაზე რომ ტრიალებს საქართველოს მომავლის ამბავი, ერთი სიტყვა თქვას, რას ფიქრობს ამ ყველაფერზე, - ეს განცხადება პარლამენტის პლენარულ სხდომაზე, “თავისუფალი ტრიბუნის“ ფორმატში გამოსვლის დროს დავით უსუფაშვილმა გააკეთა.

როგორც უსუფაშვილმა “ქართულ ოცნებას“ მიმართა, გადარჩენადია ბიძინაც და საქართველოს ევროკავშირის კანდიდატობაც და ამისთვის უნდა იმოქმედონ.

“საბანკო ანგარიშზე პრობლემები რომ შეექმნა, იმაზე ხომ გვითხრა რაღაც - ახლა ქვეყანას რომ აქვს პრობლემები შექმნილი, ამაზე არაფრის თქმას არ აპირებს?! ან თქვენ არ გინდათ, რომ იმ კაცს შეხვდეთ და რაღაც ურჩიოთ, რომ ასე არ გამოვა, ვერ გაგრძელდება. არსად გაგრძელებულა და ვერც საქართველოში გაგრძელდება... ის ხომ მთელს საქართველოზე ზრუნავდა და უნდა დაანახოთ, რომ ასე გაგრძელება შეუძლებელია - დიდ უბედურებაში გავხვევთ ქვეყანას და საკუთარ თავსაც.

არის საშუალება ყველაფერი ერთად გადავარჩინოთ: - ევროკავშირშიც ვიაროთ, არც ვინმე დავასანქციროთ, არც დავიჭიროთ, არც ჩამოვკიდოთ - ამას ეროვნული თანხმობის ფორმულა სჭირდება. ის, რაც ევროკავშირმა დაგვიწერა, ერთად უნდა გავაკეთოთ. ერთობა ჩვენ გვჭირდება - ევროპაში ცალ-ცალკე არავინ არავის მიიღებს“, - მიმართა უსუფაშვილმა “ქართულ ოცნებას“.