პარლამენტის სხდომათა დარბაზში, სადაც პრემიერ-მინისტრის ანგარიშს უსმენენ, კვლავ ხმაური იყო.

მას შემდეგ, რაც პრემიერის გამოსვლას დარბაზიდან „ნაციონალური მოძრაობის“ წარმომადგენლებისა და მათ შორის ანა წითლიძის მხრიდან შეძახილები მოჰყვა. პარლამენტის თავმჯდომარემ შალვა პაპუაშვილმა წითლიძეს თავდაპირველად დარბაზის დატოვებისკენ მოუწოდა, თუმცა ოპოზიციონერი დეპუტატი მიმართვას არ დაემორჩილა და დარბაზში დარჩა. შემდეგ პაპუაშვილმა მას კიდევ ერთხელ მიმართა და უთხრა, რომ თუ რეგლამენტს კიდევ ერთხელ დაარღვევს, დარბაზს დაატოვებინებს.

„რა პოლიტიკურ კულტურაზე გელაპარაკოთ ან რა დეპოლარიზაციაზე. ჩანს, რომ სხდომის ჩაშლა გინდათ. თუ რამეს არ ეთანხმებით, გექნებათ დრო, რომ ისაუბროთ. ახლა იქონიეთ კულტურა, რომ მოხსენება მოისმინოთ. მიკროფონის გარეშე საუბარი არის რეგლამენტის დარღვევა. ეს არის ჩვენი ყველას რეგლამენტი. რეგლამენტის დარღვევა არის ყველას უპატივცემულობა“,- განაცხადა პარლამენტის თავმჯდომარემ.

პლენარული სხდომა უკვე განახლდა.