პარლამენტის წევრის, შალვა შავგულიძის განცხადებით, კონსტიტუციის 78-ე მუხლში საქართველოს ევროპულ და ევროატლანტიკურ ინტეგრაციასთან დაკავშირებით ჩანაწერი არასამთავრობო ორგანიზაციების იდეა იყო, ოპოზიცია მხარს უჭერდა, ხოლო ირაკლი კობახიძე ეწინააღმდეგებოდა. ამის შესახებ შავგულიძემ პლენარულ სხდომაზე სიტყვით გამოსვლისას აღნიშნა, რითაც გამოეხმაურა და სიცრუე უწოდა პრემიერ-მინისტრ ირაკლი ღარიბაშვილის განცხადებას, რომ 2017 წელს, მმართველი პარტიის ინიციატივით და უშუალოდ ირაკლი კობახიძის ჩართულობით გაჩნდა კონსტიტუციაში ჩანაწერი და ქვეყნის საგარეო პოლიტიკის ორიენტირი განისაზღვრა.

„კონსტიტუციის 78-ე მუხლში ჩანაწერი საქართველოს ევროპულ და ევროატლანტიკურ ინტეგრაციასთან დაკავშირებით, ჩვენი პოლიტიკური ძალის ინიციატივით გაჩნდაო, ჩვენი იყო ეს საკანონმდებლო ინიციატივა და ჩვენ შევიტანეთო, ამ შემთხვევაშიც არასწორს ბრძანებთ! პატივი მქონდა, საკონსტიტუციო კომისიის წევრი ვყოფილიყავი. ეს საკითხი დააყენეს არასამთავრობო ორგანიზაციებმა, მათი ინიციატივა იყო. ირაკლი კობახიძე ძალიან აქტიურად ეწინააღმდეგებოდა. მისი სიტყვები მახსოვს, რომ ასეთი ჩანაწერების ადგილი არ არის კონსტიტუციაშიო, სტენოგრამა შეგიძლიათ ამოიღოთ. მხოლოდ ძალიან დიდი ზეწოლის შედეგად მოხდა ამ ჩანაწერის შეტანა, ინიციატორი იყო არასამთავრობო ორგანიზაცია, მხარს ვუჭერდით ოპოზიცია“, - განაცხადა შალვა შავგულიძემ.