„ლელოს“ წევრის ანა ნაცვლიშვილის განცხადებით, ევროკავშირის კანდიდატი წევრის სტატუსი საქართველომ იმიტომ ვერ მიიღო, რომ „კარში ოლიგარქი გვეღობება“. ამის შესახებ ნაცვლიშვილი სოციალურ ქსელში წერს და აღნიშნავს, რომ მომდევნო 6 თვე არის შანსი, რომ მომავალი გადარჩეს.

„ჩემო თანამოქალაქეებო, პროპაგანდის მანქანა ისევ მოიქოქა, თითქოს საზეიმოდაა საქმე და რომ არ დაგაბნიონ, გავასწოროთ ფოკუსი;

საქმე იმაში კი არაა, რა მივიღეთ დღეს! საქმე იმაშია, რისი მიღების შანსი გვქონდა და რა დავკარგეთ (ამ ეტაპზე)! და ყველაზე მთავარი - რატომ დავკარგეთ! იმიტომ ვერ მივიღეთ, რომ კარში გვეღობება ოლიგარქი და მის მიერ მართული მთავრობა და მასთან გარიგებაში მყოფი სასამართლო კლანი. ეს გვითხრეს ძალიან მკაფიოდ. რაც იმას ნიშნავს, რომ თუ ესენი დარჩნენ, ამ კარში ჩვენ ვერ შევალთ ვერც ახლა, ვერც მომავალში.

კარგი ამბავი ისაა, რომ ეს 6 თვე არის შანსი გადავარჩინოთ მომავალი!“- წერს ანა ნაცვლიშვილი.

ცნობისთვის, ევროპულმა საბჭომ უკრაინისთვის და მოლდოვისთვის ევროკავშირის კანდიდატის სტატუსის მინიჭების გადაწყვეტილება მიიღო, ხოლო საქართველოსთვის ევროპული პერსპექტივის და მზადაა კანდიდატის სტატუსი მიანიჭოს, როგორც კი "დასახული პრიორიტეტები შესრულდება".