“თბილისი პრაიდის” კვირეულის ფარგლებში პირველი ღონისძიება, რომელიც დახურულ ფორმატში იმართებოდა, დასრულდა.

დღევანდელ ღონისძიებაზე აჩვენეს ქართული ქვიარ ფილმი სახელწოდებით “სველი ქვიშა”.

ფილმის პრეზენტაციას ესწრებოდნენ საქართველოში აკრედიტებული ელჩები. კერძოდ კი, ევროკავშირის ელჩი კარლ ჰარცელი, ისრაელის ელჩი რან გიდორი, აშშ-ს ელჩი კელი დეგნანი, საფრანგეთის ელჩი დიეგო კოლასი.

ტერიტორიის მიმდებარედ, სადაც “პრაიდის” ღონისძიება ტარდებოდა, იმყოფებოდნენ “თბილისი პრაიდის” მოწინააღმდეგეები, საპროტესტო აქციას "ბავშვთა უფლებათა დაცვის საზოგადოება", "ალტ-ინფო" და "მართლმადიდებელ მშობელთა კავშირი" მართავდნენ.

უსაფრთხოების მიზნით ადგილზე მობილიზებული იყო პოლიცია, ასევე განლაგებული იყო რკინის ჯებირები.

დიპლომატებსა და პრეზენტაციის სხვა დამსწრე პირებს სწორედ რკინის ჯებირების გავლით უწევდათ ღონისძიებაზე შესვლა.

“თბილისი პრაიდის” ბოლო ღონისძიება 2 ივნისს, ასევე დახურულ რეჟიმში გაიმართება.