დღევანდელი ინციდენტი და სტუდენტებზე თავდასხმის საზარელი ფაქტი სისტემის ლპობის კიდევ ერთი დასტურია, - ამის შესახებ „სტრატეგია აღმაშენებლის“ წევრი და განათლების მიმართულების ხელმძღვანელი ნანა ტოხვაძე აცხადებს.
მისი თქმით, „ქართულ ოცნებას“ სტუდენტებზე ფიზიკური ანგარიშსწორება ძვირად დაუჯდება და ეს ქმედება მათთვის განაჩენი გახდება.
„#შინევროპისკენ კამპანიაში ჩართულ სტუდენტებზე ძალადობა და ფიზიკური ანგარიშსწორება „ქართული ოცნების“ პოლიტიკური დიაგნოზია. ეს ჯგუფი უკვე დიდი ხანია სრულად გამოიფიტა და სახელმწიფოს მმართველობაში თავი ამოწურა.
იმ საზოგადოებაში, სადაც მოქალაქეთა 85% პროევროპულია, მმართველ გუნდს სტუდენტებზე თავდასხმის ფაქტი ძვირი დაუჯდება. საქართველოში ახალგაზრდებზე ჯერ არავის გაუმარჯვია. სტუდენტებთან ყველა პოლიტიკური ჯგუფი მარცხდება და ეს „ოცნების“ განაჩენია”, - განაცხადა ნანა ტოხვაძემ.