საქართველოში გასაყოფი არაფერი გვაქვს. ძალამ, რომელიც აპირისპირებს და ეროვნულ თანხმობაზე უარს ამბობს, მოქალაქეებისგან პასუხი მშვიდობიანი ფორმით უნდა მიიღოს, - ამის შესახებ „სტრატეგია აღმაშენებლის“ ლიდერმა, გიორგი ვაშაძემ რუსთაველის გამზირზე განაცხადა, სადაც სამოქალაქო საზოგადოების ორგანიზებით აქცია - „წინ ევროპისკენ“ მიმდინარეობს.

როგორც გიორგი ვაშაძემ ჟურნალისტებთან აღნიშნა, ეროვნულ თანხმობას სჭირდება ისეთი მთავრობა, რომელიც საქართველოს ევროკავშირამდე მიიყვანს.

„ოლიგარქიული რეჟიმი მილევად რეჟიმშია. ახლა მთავარია გვქონდეს რწმენა, რომ ამ გამარჯვებას ბოლომდე მივიყვანთ. მათ უნდათ, ჩვენი რწმენა გატეხონ. ეს ხალხი, ვინც აქ არის, ეროვნული თანხმობაა. ეროვნულ თანხმობას სჭირდება ისეთი მთავრობა, რომელიც მათ მოუსმენს ეროვნული თანხმობით და საქართველოს ევროკავშირამდე მიიყვანს. ეს გვინდა, მეტი არაფერი. მეორე მხარეს ძალიან ცოტა არის დარჩენილი, ისინიც ამ დიდ თანხმობას შემოუერთდებიან. საქართველოში ჩვენ გასაყოფი არაფერი გვაქვს. ძალამ, რომელიც აპირისპირებს და ეროვნულ თანხმობაზე უარს ამბობს, პასუხი მშვიდობიანი ფორმით უნდა მიიღოს მოქალაქეებისგან. გეგმას მეც სცენიდან მოვისმენ და ყველა პროცესში მივიღებ მონაწილეობას“, - აღნიშნავს გიორგი ვაშაძე.