ირაკლი კობახიძე - გუშინ რაც ვიხილეთ ცხადყოფს იმას, რომ ევროპული პერსპექტივა ამ ადამიანებს საერთოდ არ აინტერესებთ და პირიქით, საწინააღმდეგო მიმართულებით მოძრაობენ
გუშინ რაც ვიხილეთ სამწუხაროდ, ცხადყოფს იმას, რომ ევროპული პერსპექტივა ამ ადამიანებს საერთოდ არ აინტერესებთ და პირიქით, საწინააღმდეგო მიმართულებით მოძრაობენ. მათ ინტერესებშია აშკარად, რომ საქართველომ კანდიდატის სტატუსი არც დეკემბერში მიიღოს, თუმცა ჩვენ ყველაფერს საპირისპირო მიმართულებით გავაკეთებთ, - ამის შესახებ „ქართული ოცნების“ თავმჯდომარემ, ირაკლი კობახიძემ პრესკონფერენციაზე განაცხადა.
მისივე თქმით, ევროკომისიის მიერ შემუშავებული ვალდებულებების შესასრულებლად მმართველ გუნდში შეხვედრა გაიმართა, სადაც გეგმის რეალიზაციის დეტალები განიხილეს.
„რაც შეეხება პერსპექტივებს, დამოკიდებულება ოპტიმისტურია, თუ არაოპტიმისტური -ვნახოთ, ამას ყველაფერს მოვლენების განვითარება აჩვენებს. ჩვენ ქვეყნის ინტერესებიდან გამომდინარე ვიმოქმედებთ და ამ ინტერესებიდან გამომდინარე, 12-ვე პუნქტის შესასრულებლად ყველა ნაბიჯი გადაიდგმება. ეს არის ჩვენი პასუხისმგებლობა. შეიძლება ვინმეს არაოპტიმისტური დამოკიდებულება ჰქონდეს, თუმცა ჩვენ, რა თქმა უნდა, ჩვენი პასუხისმგებლობის მიხედვით ვიმოქმედებთ,“ - განაცხადა ირაკლი კობახიძემ.
მისივე თქმით, არსებობს რისკები იმისა, რომ ოპოზიციამ ევროკომისიის მიერ შემუშავებული ვალდებულებების შესრულებაში კონსტრუქციული მონაწილეობა არ მიიღოს.
„რა თქმა უნდა, რისკები არსებობს ამ თვალსაზრისით, რომ მათ ამ გეგმის აღსრულებაში კონსტრუქციული მონაწილეობა არ მიიღონ და ეს პუნქტები გამოიყენონ იმისათვის, რომ პირიქით, პროცესი მაქსიმალურად უარყოფითი მიმართულებით წარმართონ, რათა საქართველომ დეკემბერში კანდიდატის სტატუსი არ მიიღოს. ეს მოტივაცია, რა თქმა უნდა, მათ თითოეულ ქმედებაში იკვეთება. შესაბამისად, რისკები არსებობს, თუმცა ჩვენ ჩვენი პასუხისმგებლობის შესაბამისად ვიმოქმედებთ. ჩვენი მიზანია, რომ საქართველომ 6 თვის თავზე კანდიდატის სტატუსი მიიღოს. შეიძლება იმ ადამიანებს, ვინც გუშინ იყო შეკრებილი, ამის საპირისპირო მიზანი ჰქონდეს, მაგრამ ჩვენ ჩვენს მიზანს გავყვებით,“ - განაცხადა კობახიძემ.
