რაჟდენ კუპრაშვილის განცხადებით, სექსუალური ძალადობის მსხვერპლი არასრულწლოვნების საქმეზე სიუჟეტი მზადდება და თუ ის ეთერში გავა, კონკრეტული ჟურნალისტების მიმართ პასუხისმგებლობის დაკისრებას მოითხოვს

იურიდიული დახმარების სამსახურის დირექტორის რაჟდენ კუპრაშვილის განცხადებით, მისი დაცვის ქვეშ მყოფი სექსუალური ძალადობის მსხვერპლი არასრულწლოვნების საქმეზე სიუჟეტი მზადდება და იმ შემთხვევაში თუ ის ეთერში გავა, კონკრეტული ტელევიზიისა და ჟურნალისტების მიმართ პასუხისმგებლობის დაკისრებას მოითხოვს.

ამის შესახებ განცხადებას იურიდიული დახმარების სამსახური ავრცელებს და სახალხო დამცველს დაინტრესებისკენ მოუწოდებს.

„იურიდიული დახმარების სამსახურის წარმოებაშია ორი არასრულწლოვანის საქმე. არასრულწლოვნები არიან სექსუალური ძალადობის მსხვერპლნი და ცნობილი არიან დაზარალებულად. აღნიშნულ საქმეში ბრალი წაყენებული აქვს მამინაცვალს.

ჩვენი ინფორმაციით, ტელეკომპანია „ტვ პირველის“ ჟურნალისტების მიერ მზადდება სიუჟეტი „ნოდარ მელაძის შაბათისთვის“ აღნიშნულ საქმესთან დაკავშირებით. ბენეფიციარების განცხადებიდან ირკვევა, რომ გამოიკითხნენ არასრულწლოვანების მეზობლები, ბენეფიციარის ახლო ნათესავები. ასევე, ვფლობთ ინფორმაციას, რომ ჟურნალისტების მიერ მოხდა არასრულწლოვანების ფარული ჩაწერა. ბავშვებისა და მათი ბებიის არაერთი თხოვნის მიუხედავად, ტელეკომპანია უარს არ ამბობს აღნიშნული გადაცემის ეთერში გაშუქებაზე.

გუშინ საღამოს, არასრულწლოვნებმა მოგვმართეს დახმარებისათვის. მათი უდიდესი თხოვნაა, აღნიშნული სიუჟეტი არ გავიდეს ეთერში, ვინაიდან, ამ შემთხვევაში მოხდება მათი იდენტიფიცირება, შესაბამისად, კონფიდენციალურობა ვერანაირად იქნება უზრუნველყოფილი. ბავშვების ფსიქოემოციური მდგომარეობა არის უმძიმესი. არსებობს ფაქტები, რომ ერთ-ერთი არასრულწლოვანის მხრიდან ადგილი ჰქონდა სუიციდის მცდელობას. მინდა მივმართო თხოვნით ტელეკომპანია „ტვ პირველის" ჟურნალისტებსა და ნოდარ მელაძეს - დროა მოვუსმინოთ ერთმანეთს, მოვუსმინოთ ბავშვებს და ამ სიუჟეტის გაშვების შესახებ გადაწყვეტილების მიღებისას, გავითვალისწინოთ არასრულწლოვნების საუკეთესო ინტერესი. ვერც ერთი სპეციალისტი ვერ აიღებს პასუხისმგებლობას, რომ სიუჟეტის გაშვების შემდგომ ადგილი არ ექნება ისეთ ფატალურ შედეგს, როგორიც არის თვითმკვლელობა. ჩვენ, როგორც პასუხისმგებლობიანი პირები, ვალდებული ვართ შევაფასოთ ყველა გარემოება და მივიღოთ ისეთი გადაწყვეტილებები, რომლებიც საფრთხეს არ შეუქმნის არასრულწლოვანების სიცოცხლესა და მომავალს.

თუკი სიუჟეტი გავა ეთერში და ბავშვების ისედაც მძიმე სულიერი მდგომარეობას კიდევ ერთ ტრავმას მიაყენებს, ჩვენ განვახორციელებთ შესაბამის სამართლებრივ ღონისძიებებს და კონკრეტული ტელევიზიისა და ჟურნალისტების მიმართ მოვითხოვთ პასუხისმგებლობის დაკისრებას. იმ შემთხვევაში. თუ ბავშვების სულიერი მდგომარეობა დამძიმდება იმდაგვარად, რომ თვითმკვლელობას თუნდაც წამიერად გაივლებენ თავიანთ ფიქრებში, პასუხისმგებლობას დავაკისრებთ „ტვ პირველის“ ჟურნალისტებსა და იმ პირებს, რომლებიც აღნიშნული სიუჟეტი მოამზადებაში მონაწილეობდნენ.

აქვე, შეგახსენებთ, რომ თვითმკვლელობამდე მიყვანა ისჯება სისხლის სამართლის კოდექსით.

მივმართავთ სახალხო დამცველს, უზრუნველვყოთ ბავშვების ინტერესების დაცვა. მივმართავთ სახელმწიფო ინსპექტორს, დაიწყოს საქმის წარმოება, გამოირკვეს, თუ როგორ განხორციელდა პერსონალური ინფორმაციის გადინება ისეთ სისხლის სამართლის საქმეზე, რომელზეც კანონმდებლობით არის უზრუნველყოფილი საქმის მასალების კონფიდენციალურობა.

ვიტოვებ იმედს, რომ ბავშვების ხმა შესმენილი იქნება კონკრეტული ჟურნალისტების მიერ და კიდევ ერთხელ მინდა განვაცხადო, რომ ვერანაირი საჯარო ინტერესი ვერ გადაწონის ბავშვების საუკეთესო ინტერესს“,- აცხადებს რაჟდენ კუპრაშვილი.

დავით სიხარულიძე - ისტორიას არ ახსოვს, რომ რომელიმე ქვეყანა ძალით ნატო-ში, ან ევროკავშირში მიეღოთ
ქართული პრესის მიმოხილვა 02.12.2022
ალექსეი მალაშენკო - არავინ იცის როგორ უნდა დასრულდეს რუსეთ-უკრაინის ომი, მათ შორის არც პუტინმა
„ასტრაზენეკამ“ პროექტის „თანადგომა“ შემაჯამებელი ღონისძიება გამართა
ღვინო, რომელიც ბედნიერებას იმახსოვრებს - „მარნაველი“ - CBS ჯგუფის ახალი მიმართულება და 2022 წლის წარმატება ღვინის ბიზნესში
„კარფური" გაფართოებას აგრძელებს - თბილისში ახალი სუპერმარკეტი გაიხსნა
„ნიუ ჰოსპიტალსი“ აშშ-ის შეიარაღებული ძალების სამედიცინო სერვისების მომწოდებლად შეირჩა
გაფრთხილდი და გააფრთხილე, ჩვენი ფინანსების უსაფრთხოება ჩვენს ხელშია
„ლიბერთიმ“ განვადების აქცია დაიწყო
ბაზისბანკის ინვესტიციით, რუსთავში სავაჭრო ცენტრი და საცხოვრებელი კომპლექსი შენდება