დიდი ოდენობით საბიუჯეტო თანხების ჯგუფურად გაფლანგვაში ბრალდებულების, ყოფილი პრეზიდენტის, მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის, თეიმურაზ ჯანაშიას სასამართლო პროცესი 1-ელი აგვისტომდე გადაიდო.
დღევანდელ სასამართლო პროცესზე საქმის მოსამართლემ, ბადრი კოჭლამაზაშვილმა პენიტენციური დაწესებულებიდან და კლინიკა "ვივამედიდან" გამოგზავნილი წერილები წაიკითხა.
პენიტენციური დაწესებულებიდან წარმოდგენილი წერილის თანახმად, ბრალდებულმა მიხეილ სააკაშვილმა ჯანმრთელობის მდგომარეობიდან გამომდინარე პროცესში მონაწილეობის მიღებაზე უარი განაცხადა, ამასთან, ის უარს აცხადებდა ასევე სხდომის მის გარეშე გაგრძელებაზე.
კლინიკა "ვივამედიდან" გამოგზავნილ წერილში აღნიშნული იყო, რომ სააკაშვილი ძლიერ სისუსტეს განიცდის და რომ მისი პროცესში მონაწილეობის მიღება მიზანშეწონილი არ არის.
აღნიშნულის შემდეგ მოსამართლემ სხდომის გადადების გადაწყვეტილება მიიღო.
ცნობისთვის, აღნიშნულ საქმეზე, რომელსაც საზოგადოება ე.წ. პიჯაკების საქმედ იცნობს, მიხეილ სააკაშვილთან ერთად ბრალდებულია სახელმწიფო დაცვის სპეციალური სამსახურის ყოფილი უფროსი თეიმურაზ ჯანაშიაც. პროკურატურა ბრალდებულებს საბიუჯეტო თანხის დიდი ოდენობით - 9 მილიონი ლარის ჯგუფურად გაფლანგვას ედავება.