პარლამენტში სასამართლო რეფორმის სამუშაო ჯგუფის შეხვედრა დაიწყო, რომელსაც ოპოზიციური პარტიების ნაწილი ესწრება

პარლამენტში სასამართლო რეფორმის სამუშაო ჯგუფის შეხვედრა დაიწყო, რომელიც თავის მხრივ ევროკომისიის 12-პუნქტიანი რეკომენდაციების შესრულების ფარგლებში მმართველი პარტიის მიერ ინიცირებული პროცესის ნაწილია.

სამუშაო შეხვედრას ესწრება პარლამენტის თავმჯდომარე შალვა პაპუაშვილი. როგორც მან შეხვედრის დაწყებამდე ჟურნალისტებთან განაცხადა, დღევანდელ შეხვედრაზე სასამართლო სისტემაში დღემდე განხორციელებულ რეფორმებზე წერილობითი შეფასების დოკუმენტს წარადგენს „ქართული ოცნება“ და ოპოზიციასთან გაცვლიან მოსაზრებებს უკვე განხორციელებულ რეფორმებზე.

„ჩვენ დავიწყეთ 12 პრიორიტეტზე მუშაობა იმ გეგმის მიხედვით, რომელიც ერთი მხრივ არის ევროკომისიის მიერ რეკომენდირებული და მეორე მხრივ ჩვენ ამ გეგმას თან დავურთეთ გრაფიკი, რითაც გავწერეთ მთლიანად ეტაპები, როდის რომელი პუნქტის რომელი ნაწილი შესრულდება. სასამართლო რეფორმის ნაწილს რაც შეეხება, აქ რეკომენდაცია ევრომისიის და ევროპული საბჭოსი არის, რომ უნდა მოხდეს ანალიზის საფუძველზე რეფორმის სტრატეგიის შემუშავება და ამ რეფორმის განხორციელება შესაბამისი ცვლილებების მეშვეობით კანონში, სადაც ასევე ჩართული იქნება ვენეციის კომისია და მათი რეკომენდაციები იქნება მოსმენილი. სწორედ ამას ვაკეთებთ ჩვენ. ეს სამუშაო დაწყებული იყო და ამ კუთხით წინ ვართ უკვე. დღევანდელ შეხვედრაზე მოხდება პარტიების მიერ გაკეთებული წერილობითი ანალიზის გაცვლა. მაშინ, როცა ეს სამუშაო ჯგუფი შეიქმნა, პირველ ეტაპად დაისახა, რომ ყველა პარტიას, ფრაქციას თუ პოლიტიკურ ჯგუფს მოემზადებინა საკუთარი წერილობითი ანალიზი, თუ რა რეფორმები განხორციელდა აქამდე, სად ვართ, რა გამოწვევებია და როგორ ვუპასუხოთ მათ. ჩანს, რომ არის შეუთანხმებლობა შეფასებებში, დიაგნოზში და ამიტომ იმისთვის, რომ ამ შეფასებებში ვნახოთ, რა არის ამის არგუმენტი, საჭიროა, ეს იყო ანალიზზე და მტკიცებულებებზე დაფუძნებული. დღეს გავცვლით მოსაზრებებს. პარტია „მოქალაქეებს“ წარმოდგენილი აქვთ უკვე წერილობით ეს დოკუმენტი, „ქართული ოცნებაც“ წარადგენს და ვნახოთ, სხვები თუ მოიტანენ ასეთ წერილობით დოკუმენტს,“ - განაცხადა პაპუაშვილმა.

შეხვედრაში ოპოზიციიდან მონაწილეობენ „გირჩის“, „მოქალაქეების“, პარტია „საქართველოსთვის“ და „ევროპელი სოციალისტების“ დეპუტატები. საპარლამენტო ოპოზიციის დანარჩენი ნაწილი შეხვედრაში მონაწილეობას არ იღებს.

ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს
ქართული პრესის მიმოხილვა 11.08.2022
გიორგი კუნაძე - რუსეთის რეჟიმის  კრახი გარდაუვალია, დღეს უკვე ცხადად ჩანს, რომ ეს მხოლოდ დროის საკითხია
საქართველოს უძრავი ქონების პირველად ბაზარზე ფასების ცვლილების დინამიკა 2022 წლის ზაფხული (R)
სს ლიბერთი ბანკის საცალო საბანკო საქმის მიმართულების დირექტორად თორნიკე კორძაია დაინიშნა
USAID-ის პროგრამის ,,დამსაქმებლები პროფესიული განათლებისთვის’’ და  ,,ტრანსფორდის“ ერთობლივი ინიციატივით 43 ადამიანი დასაქმდა