იუსტიციის მინისტრის მოადგილე - პენიტენციურ სისტემაში არავითარი „ობშჩიაკი“ ვერ იქნება და არ არის მარტივი მიზეზის გამო, თანხა მატერიალური სახით პატიმრებს არ აქვთ - სისტემაში ნაღდი ფული არ ტრიალებს

საქართველოს იუსტიციის მინისტრის მოადგილის, თორნიკე ჭეიშვილის განცხადებით, ქართულ ციხეებში არავითარი „საერთოს“ შეკრება, ანუ „ობშჩიაკი“ არ არის. აღნიშნულით ის არაადამიანური და ღირსების შემლახველი მოპყრობის, ან დასჯის პრევენციის ევროპული კომიტეტის (CPT) ანგარიშს ეხმაურება.

როგორც ჭეიშვილი განმარტავს, ციხეებში ე.წ. ობშჩიაკი ვერ იქნება, ვინაიდან, იქ ფული მატერიალური სახით პატიმრებს არ აქვთ.

„თქვენ მიერ ხსენებული საკითხები შეიძლება ითქვას, რომ უარყოფილია თავად ფაქტებით, ვიდრე იქამდე მივალ, რომ საქართველოს იუსტიციის სამინისტრო ბუნებრივია, მსგავს ინფორმაციას არ ადასტურებს. ფაქტები ცხადყოფს, რომ არავითარი საერთო, ანუ „ობშჩიაკი“ ვერ იქნება და არ არის პენიტენციურ სისტემაში ძალიან მარტივი მიზეზის გამო, თანხა მატერიალური სახით, პატიმრებს არ აქვთ. იქ არის სპეციალური ბარათები, რომლითაც მათ შეუძლიათ კანონმდებლობით დაშვებული ნივთები შეიძინონ.

რაც შეეხება სხვადასხვა ნიშნებს, თუ მცდელობას, ვიღაცამ ვიღაცაზე გარკვეული გავლენა მოახდინოს, როცა საუბარია მსგავს ნიშნებზე, რა თქმა უნდა, პენიტენციური სამსახური მყისიერად ატარებს ზომებს, რათა, თუ ეს ნიშნები არის, აღმოფხვრილი იყოს. მეორე მხრივ, როცა საუბარია ე.წ. სუბკულტურაზე, გეტყვით, რომ არსებობს ძალიან ეფექტიანი მექანიზმები პენიტენციურ სისტემაში იმისათვის, რომ ნებისმიერი მიდრეკილება, ნებისმიერი მცდელობა პატიმართა შორის გარკვეული იერარქიის არსებობისა, იყოს დაზღვეული და გამორიცხული. ეს პირველ ყოვლისა, არის პატიმრის გადაყვანის მექანიზმი, პატიმართა რისკის ინდივიდუალური შეფასება და ა.აშ “,- აღნიშნა მან.

მისივე განმარტებით, ერთეული ფაქტებით სისტემურ პრობლემებზე არ უნდა ისაუბრონ.

„გამოწვევები არსებობს და გამოწვევები ნებისმიერი სახელმწიფოს ნებისმიერ პენიტენციურ სისტემაში არსებობს. რაც მთავარია, ცალკეული ინციდენტებით არ უნდა ვიმსჯელოთ და ვთქვათ, რომ სისტემური პრობლემაა ე.წ. კრიმინალური სუბკულტურის არსებობა, ან ე.წ. ობშჩიაკის აკრეფა და ა.შ. „ობშჩიაკს“ როგორ დავადასტურებ, ფული, როგორც ასეთი, ციხეში - პენიტენციურ სისტემაში არ ტრიალებს. სრული პასუხისმგებლობით გიდასტურებთ, პენიტენციურ სისტემაში ნაღდი ფული არ ტრიალებს“,- განაცხადა მინისტრის მოადგილემ.

ჭეიშვილის თქმითვე, საქართველოს არც ერთ ციხეში პატიმრებს კონდიციონერები არ აქვთ.

„კონდიციონერთან დაკავშირებით ასევე სრული პასუხისმგებლობით შემიძლია გითხრათ, რომ არც ერთ საკანში არავითარი კონდიციონერის არსებობის ფაქტი არ დასტურდება. არის სპეციალური ოთახი - ჯანდაცვის პუნქტი, სადაც იმისათვის, რომ პრეპარატების შენახვა მოხდეს შესაბამის ტემპერატურაზე, დამონტაჟებულია კონდიციონერი. არავითარი კონდიციონერი და გაგრილების სისტემა ინდივიდუალურად და ექსკლუზიურად რომელიმე საკანში დღეს, საქართველოს პენიტენციურ სისტემაში არ არის. რაც შეეხება „პარკეტს“, თითოეულ პატიმარს აქვს თავისი ლიმიტი, რომელიც ყოველთვიურად შეუძლია აითვისოს, თუ ამ თანხის ფარგლებში, მას მაღაზიაში შეუძლია შეიძინოს გარკვეული ნივთი, ან მასალა, რომლითაც თავადვე კეთილმოწყობას საკანს, ეს მისი უფლებაა. მათ შორის, მე-17 დაწესებულებაში როგორც ჩემთვისაა ცნობილი, გარკვეულ ეტაპზე ხელმისაწვდომი იყო ე.წ. ლამინატი. სავარაუდოდ, წესების დაცვით მოხდა შეძენა, თუმცა, ესეც გადასამოწმებელია“, - განაცხადა ჭეიშვილმა.

ამასთან, მინისტრის მოადგილის თქმით, უკვე დაწყებულია და აქტიურ ფაზაში შევიდა პატიმრობის ახალ კოდექსზე მუშაობის პროცესი, რომელიც საშემოდგომო სესიისთვის საქართველოს პარლამენტს უნდა წარედგინოს.

„შექმნილია შესაბამისი უწყებათშორისი ჯგუფი, ეს პატიმრობის ახალი კოდექსი და აღნიშნული ფორმატი იმისკენ იქნება ორიენტირებული, რომ ნებისმიერი საკითხი, რომელიც დღეს პრაქტიკაში შეიძლება მწვავედ იდგეს, პირველ ყოვლისა, საკანონმდებლო დონეზე იქნეს აღმოფხვრილი, რასაც შემდეგ ეტაპზე მოჰყვება შესაბამისი კანონქვემდებარე აქტების გადასინჯვა, საუბარი მაქვს, ციხეების დებულებებზე და .ა.შ“, - განაცხადა ჭეიშვილმა.

ცნობისთვის, არაადამიანური და ღირსების შემლახველი მოპყრობის ან დასჯის პრევენციის ევროპული კომიტეტის ანგარიშის თანახმად, არაერთმა პატიმარმა დაუდასტურა დელეგაციას იერარქიის არსებობა და ფულის შეგროვება პატიმართა უკანონო ფონდისთვის, „ობშჩიაკისთვის“.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს