არანაირი “ქართული ოცნების“ გზავნილი ანტიამერიკული და ანტიევროპული კამპანია არ არის - ძალიან გთხოვთ, ამ კუთხით შეფასებაში კორექტულები იყოთ და ხელისუფლების პოლიტიკაში ნურაფერს ეძებთ! - ამის შესახებ “ქართული ოცნების“ დეპუტატმა ირაკლი ქადაგიშვილმა ჟურნალისტებს განუცხადა.
ქადაგიშვილის თქმით, საქართველოში რიტორიკით ყველა თემის დამძიმება ხდება, როცა ან ანტიამერიკული ან პრორუსი უნდა იყო.
“ფაქტი ერთია - საქართველო ყველაფერს აკეთებს იმისთვის, რომ საერთაშორისო საზოგადოების სოლიდარული იყოს. მეორეს მხრივ, საქართველო ყველაფერს აკეთებს იმისთვის, რომ ქვეყანაში რაიმე კუთხით სიტუაცია არ დაიძაბოს - მათ შორის რუსეთთან კონფრონტაციის გაზრდის კუთხით. ასეთია ჩვენი ეროვნული ინტერესები“, - აღნიშნა ირაკლი ქადაგიშვილმა.
ქადაგიშვილი იმასაც ამბობს, რომ “ბევრი შიდა და გარე აქტორისგან ისეთი განცხადებები კეთდება, რომლის უკან ვარაუდებისა და აღქმების გარდა არაფერია“.
“ჩვენ ამ რამდენიმე დღის წინ ბატონ მაიკლ მაკფოლის განცხადება მოვისმინეთ, რომელიც უკრაინის მთავრობას ჰყავს დაქირავებული. ისაუბრა, ვინ არის ოლიგარქი - დანიშნული ჰყავს ოლიგარქები, ვის დაასანქცირებს და ვის - არა. ასეთი კამპანია საზოგადოებაში ნეგატიურ განწყობებს ბადებს, რასაც კარგი მიმართულება არა აქვს. პირიქით - ასეთი განწყობები ყოვლად მიუღებელია“, - განაცხადა ირაკლი ქადაგიშვილმა.