შალვა პაპუაშვილი „ოცნებიდან“ გასულ დეპუტატებზე - როგორ უნდა გავემიჯნო განცხადებას, რომელიც არ არის ჩვენი გუნდის მიერ გაკეთებული?! ეს ხომ აბსურდია!
ოპონენტები რასაც იტყვიან გასაგებია, როგორ უნდა გავემიჯნო განცხადებას, რომელიც არ არის ჩვენი გუნდის მიერ გაკეთებული?! ეს ხომ აბსურდია, - ასე უპასუხა პარლამენტის თავმჯდომარე შალვა პაპუაშვილმა კითხვას ემიჯნება თუ არა „ქართული ოცნებიდან“ წამოსული დეპუტატების - სოზარ სუბარის, მიხეილ ყაველაშვილისა და დიმიტრი ხუნდაძის მიერ გაკეთებულ განცხადებებს.
მისივე თქმით, მიუღებელია როდესაც პოლემიკაში შესვლის ნაცვლად ამ ადამიანებისთვის კლიშეების მიწებება ხდება.
„ამ განცხადებებს შინაარსობრივად არანაირად არ ვაფასებ, მხოლოდ შევაფასე კლიშეების მიწებების ტალღა ადამიანების მიმართ, რაც ჩემთვის მიუღებელია. რაც არ უნდა კრიტიკული მოსაზრება ან კითხვა იყოს, როდესაც პოლემიკაში შესვლის ნაცვლად ხდება კლიშეების მიწებება, ეს ნიშნავს, რომ საქმე გვაქვს პროპაგანდასთან. სურთ გააჩუმონ ადამიანები, ან მათ სიტყვას ფასი დაუკარგონ“, - აღნიშნა შალვა პაპუაშვილმა.
შეგახსნებეთ, რომ 3 დეპუტატის - სოზარ სუბარის, მიხეილ ყაველაშვილის და დიმიტრი ხუნდაძის შემდეგ „ქართული ოცნება“ საკრებულოების რამდენიმე წევრმაც დატოვა.
