ევროპარლამენტში საქართველოს მიერ ასოცირების შეთანხმების შესრულების ანგარიში წარადგინეს, რომელშიც მთელი რიგი მიმართულებით რეფორმების გატარების აუცილებლობაზეა საუბარი

დოკუმენტი მიესალმება ევროპული საბჭოს გადაწყვეტილებას, აღიაროს საქართველოს ევროპული პერსპექტივა და იმეორებს, რომ სტატუსის მინიჭებისათვის საქართველომ წარმატებით უნდა შეასრულოს ის ძირითადი პრიორიტეტები, რომლებიც მითითებულია კომისიის მიერ საქართველოს ევროკავშირში გაწევრების განაცხადის შესახებ დასკვნაში, - ამის შესახებ ევროპარლამენტარმა სვენ მიქსერმა განაცხადა, რომელმაც დღეს ევროპარლამენტში საქართველოს ევროკავშირთან ასოცირების ხელშეკრულების შესრულებაზე მომზადებული ყოველწლიური ანგარიშის პროექტი წარადგინა.

მისივე თქმით, დოკუმენტი ასევე მოუწოდებს საქართველოს ხელისუფლებას, დაიცვან დემოკრატიის, კანონის უზენაესობისა და ფუნდამენტური თავისუფლებების უმაღლესი სტანდარტები და მტკიცედ დაიწყოს კომისიის მოსაზრებაში მითითებული რეფორმების განხორციელება, იმისთვის, რომ აჩვენონ თავიანთი პოლიტიკური გადაწყვეტილება, განახორციელონ ქვეყნის ამბიციური ევროპული მისწრაფებები.

„ანგარიშის პროექტში წუხილია გამოთქმული, რომ სიღრმისეული პოლარიზაცია კვლავ არის საქართველოს პოლიტიკური გარემოს განმსაზღვრელი მახასიათებელი. დოკუმენტი კიდევ ერთხელ იმეორებს, რომ ევროკავშირის შუამავლობით მიღწეული, 2021 წლის 19 აპრილის შეთანხმების ძირითადი დებულებები კვლავ წარმოადგენს გზას საქართველოში დემოკრატიისა და კანონის უზენაესობის განმტკიცებისკენ.

დოკუმენტი ხაზს უსვამს მართლმსაჯულების რეფორმის განხორციელების მნიშვნელობას 2021 წლის შემდგომი სასამართლო რეფორმის გამჭვირვალე და ეფექტიანი სტრატეგიისა და სამოქმედო გეგმის საფუძველზე ფართო, ინკლუზიური და მრავალპარტიული საკონსულტაციო პროცესის მეშვეობით; მოუწოდებს ხელისუფლებას, გამოასწორონ ვენეციის კომისიის მიერ გამოვლენილი ხარვეზები ყველა დონის სასამართლოში მოსამართლეთა წარდგენისა და დანიშვნის პროცესში და გენერალური პროკურორის წარდგენისა და დანიშვნისას, რათა პროცესი სრულად შეესაბამებოდეს ევროპულ სტანდარტებს; მოუწოდებს იუსტიციის უმაღლესი საბჭოს საფუძვლიანი რეფორმის გატარებისა და საბჭოს დარჩენილი წევრების დანიშვნისკენ.

ხაზს უსვამს, რომ ნაჩქარევი და არაგამჭვირვალე ნაბიჯები მნიშვნელოვანი დანიშვნების ან ინსტიტუციური ცვლილებების დროს მხოლოდ აძლიერებს აღქმას, რომ მართლმსაჯულების სისტემა პოლიტიზებულია. ამ კუთხით აღნიშნავს, რომ უზენაესი სასამართლოს მოსამართლეები დანიშნეს „ოდირისა“ და ვენეციის კომისიის მიერ გამოვლენილი ხარვეზების სრულ გამოსწორებამდე; იმეორებს, რომ სასამართლო რეფორმირების პროცესში პროგრესის არ არსებობდა გახდა მიზეზი, რომ ქვეყანამ ვერ მიიღო ევროკავშირის მაკროფინანსური დახმარების 75 მილიონი ევროს ტრანში გასული წლის სექტემბერში.

მოუწოდებს საქართველოს ხელისუფლებას, ეფექტურად გამოიძიოს გასული წლის სექტემბერში გამოვლენილი მასობრივი უკანონო მოსმენების საქმე; შეშფოთებულია საქართველოს სისხლის სამართლის საპროცესო კოდექსში შეტანილი ცვლილებებით, რაც ზრდის იმ დანაშაულთა რაოდენობას, რომლებზეც ნებადართულია ფარული საგამოძიებო მოქმედებების ჩატარება.

კიდევ ერთხელ აცხადებს, რომ მნიშვნელოვანია საქართველოს სახელმწიფო ინსტიტუტებზე დამოუკიდებელი ზედამხედველობის განხორციელება და ამ კუთხით, სინანულს გამოხატავს სახელმწიფო ინსპექტორის სამსახურის გაუქმების გამო „ოდირის“ რეკომენდაციების საწინააღმდეგოდ და ხაზს უსვამს საქართველოს სახალხო დამცველის დადებით როლს ადამიანის უფლებების დაცვაში, კარგი მმართველობის ხელშეწყობასა და კანონის უზენაესობის განმტკიცებაში“, - აღნიშნულია ანგარიშში.

ემილ ავდალიანი - ყველაფერი რეგიონში საქართველოს უფრო მზარდ როლზე მოასწავებს, საჭიროა მხოლოდ შექმნილი ვითარების სწორად გამოყენება
ქართული პრესის მიმოხილვა 18.08.2022
ალექსეი გარანი - პუტინს უნდა რომ უკრაინა დათმობებზე წავიდეს, მაგრამ უკრაინა მშვიდობის სანაცვლოდ, ქვეყნის ტერიტორიულ მთლიანობასთან დაკავშირებული საკითხებით ვაჭრობას არ აპირებს
„ევროპელი სოციალისტების” წევრები, დავით ზილფიმიანი და ზაზა მიქაძე ერთობლივ განცხადებას ავრცელებენ
კომპანია PSP ფარმაცევტული სექტორის განვითარებაზე კონცენტრირდება და არაპროფილური ბიზნესებიდან გამოდის
კახა ოქრიაშვილი - საერთაშორისო იზოლაცია, უვიზო მიმოსვლის შეჩერება, ტოტალური გაღატაკება - აი, ეს მოაქვს ბატონ ივანიშვილს
გავლენიანმა საერთაშორისო ბიზნეს გამოცემა Global Finance-მა 2022 წლის გამარჯვებულები გამოავლინა