„ქართულ ოცნებას" ვურჩევ: რუსეთის გუბერნიების ისტორიები დეტალურად რომ იციან, ევროკავშირში ახალგაწევრიანებული ქვეყნების ისტორიებიც შეისწავლონ - ის, ვინც ამბობს, რომ კანდიდატის სტატუსი არაფერია, საქართველოს მოღალატეა, - ამის შესახებ ჟურნალისტებს „სტრატეგია აღმაშენებლის" ლიდერმა გიორგი ვაშაძემ განუცხადა.

ვაშაძის თქმით, ყველა იმ ქვეყანამ, ვინც ევროკავშირის წევრობის კანდიდატის სტატუსი მიიღო, ევროკავშირის ფინანსური მხარდაჭერა მოიპოვა იმისთვის, რომ ეკონომიკა „ამოექაჩა".

„ქართულ ოცნებას" ვურჩევ, თვალის მოსკოვისკენ ცეცების ნაცვლად, ბალტიისპირეთის ქვეყნებისკენ გაიხედონ, რომლებიც საქართველოს მსგავსად საბჭოთა კავშირის წევრები იყვნენ. მათი დამოუკიდებლობაც რუსული იმპერიის მიერ იყო მიტაცებული. როგორც კი ისინი ევროკავშირის წევრობის კანდიდატი ქვეყნები გახდნენ, მრავალი მილიარდი მიიღეს, რომ სოფლის მეურნეობიდან დაწყებული, განათლებისა და ჯანდაცვის სისტემით გაგრძელებული და ტექნოლოგიებით და ეკონომიკის სხვა დარგებით დამთავრებული მაქსიმალურად სწრაფად ამოექაჩათ განვითარების დონე, რათა ევროკავშირის წევრ ქვეყნებს დასწეოდნენ", - განაცხადა გიორგი ვაშაძემ.