მოსამართლე საზოგადოებას სასამართლო აქტებითა და გადაწყვეტილებებით უნდა ესაუბროს - შესაბამისად, ამ ეტაპზე, მე არ გავაკეთებ კომენტარს ჩემი აცილების შუამდგომლობის თაობაზე , - ამის შესახებ "ინტერპრესნიუსს" საკონსტიტუციო სასამართლოს მოსამართლემ გიორგი კვერენჩხილაძემ განუცხადა.
"აცილების საკითხს საკონსტიტუციო სასამართლოს პლენუმი განიხილავს და მიიღებს შესაბამის გადაწყვეტილებას, სადაც დაფიქსირდება ჩემი პოზიცია ხსენებული შუამდგომლობის საფუძვლიანობის შესახებ", - აღნიშნა საკონსტიტუციო სასამართლოს მოსამართლემ.
საქართველოს პარლამენტი საკონსტიტუციო სასამართლოში განსახილველ ერთ-ერთ საქმეზე მოსამართლე გიორგი კვერენჩხილაძის აცილებას ითხოვს.
როგორც იურიდიულ საკითხთა კომიტეტის თავმჯდომარე ანრი ოხანაშვილი განმარტავს, კვერენჩხილაძემ სოციალურ ქსელში საჯაროდ დააფიქსირა პოზიცია და გამოხატა დამოკიდებულება საქმისადმი, რომელიც მან უნდა განიხილოს და იყოს მომხსენებელი.
საქმე “საერთო სასამართლოების შესახებ“ ორგანულ კანონში შეტანილ ცვლილებებს ეხება. თავის მხრივ, საკონსტიტუციო სასამართლოში პარლამენტის ინტერესების წარმომადგენლობას იურიდიულ საკითხთა კომიტეტის აპარატი ახორციელებს.