ირაკლი ზარქუა - ელჩის ინიციატივით ჩაინიშნა შეხვედრა და გრძელდებოდა 3 საათი, არ მგონია სპორტის განვითარებაზე ყოფილიყო საუბარი - მსოფლიოს მთავარი გამოწვევა ომია, როგორც მაქვს ინფორმაცია, შეიძლება ამაზე ესაუბრათ

ფაქტია, ელჩის ინიციატივით ჩაინიშნა ეს შეხვედრა და თან გრძელდებოდა სამი საათი, არ მგონია სპორტის განვითარებაზე ყოფილიყო საუბარი, მსოფლიოს მთავარი გამოწვევა ომია - როგორც მაქვს ინფორმაცია, შეიძლება ამაზე ესაუბრათ, - ამის შესახებ ჟურნალისტებთან საპარლამენტო უმრავლესობის წევრმა ირაკლი ზარქუამ აშშ-ის ელჩის კელი დეგნანის განცხადების კომენტირებისას აღნიშნა.

მისი თქმით, საქართველოს ომში ჩართვა მმართველი პარტიის მოგონილი თემა არ არის.

"კონკრეტული ადამიანები, მათ შორის, საქართველოში რადიკალური ოპოზიციიდან, არასამთავრობო ორგანიზაციებიდან, გვარები იყო ჩამოთვლილი, იყო მათ შორის, უკრაინის მაღალჩინოსნებიდან, ყველამ იცის გვარები, ვისგანაც პირდაპირი მოწოდება იყო - "იქნებ მეორე ფრონტი გაიხსნას, საკმარისია ჩვენი ბავშვების და დედების მკვლელობები", ჩვენ, მმართველ პარტიას ხომ არ მოგვიგონია ეს?! ამაზე ვთქვით, რომ გამორიცხულია, ჩვენი ქვეყანა არ ჩაერთვება ომში,"- განაცხადა ზარქუამ.

კითხვაზე, ფიქრობს, თუ არა, რომ სწორედ ამ თემაზე იყო საუბარი ივანიშვილსა და კელი დეგნანს შორის, ზარქუა პასუხობს, რომ როგორც ინფორმაცია აქვს, შეიძლება ამაზე ყოფილიყო.

"როგორც მე მაქვს ინფორმაცია გარკვეული ჯგუფებისგან მათ შორის, შეიძლება ყოფილიყო, მაგრამ ამას ვერ ვადასტურებ, არ ვესწრებოდი, არ ვიცი, ამიტომ კარგი იქნება, თუ ამაზე ერთი მხარეც და მეორეც მკაფიო განცხადებას გააკეთებს, თუ რას ეხებოდა შეხვედრა. ფაქტია, ელჩის ინიციატივით ჩაინიშნა ეს შეხვედრა და თან გრძელდებოდა სამი საათი, არ მგონია სპორტის განვითარებაზე ყოფილიყო საუბარი. არც შეიძლება მეათე ხარისხოვან თემებზე ყოფილიყო, მთავარი გამოწვევა მსოფლიოსი არის ომი, სადაც რუსეთია აგრესორი და იპყრობს უკრაინის ტერიტორიებს. სავარაუდოდ, გონივრულო ეჭვი არსებობს, რომ ამაზე იყო, თუმცა, ვერ ვადასტურებ,"- განაცხადა ზარქუამ.

ამასთან, ზარქუა აცხადებს, გაუხარდება თუ მოწოდებები ოპოზიციის მისამართით გაკეთდება და სწორი აქცენტები დაისმება.

"ვინც ანტიდასავლურ კამპანიას ეწევა, ეს არის რადიკალურო ოპოზიცია და გამიხარდება თუ ქალბატონი ელჩი და სხვა ელჩები მოუწოდებენ ე.წ. რევოლუციონერებს, რომლებმაც ალტერნატიული გზა შექმნეს - ტექნიკური მთავრობა და პარლამენტი, რომ იქნებ დაუბრუნდნენ კონსტრუქციულ ნაწილს.

თუ ვინმე სანქციების თემას დიდ დროს უთმობს, ესენი არიან ხოშტარიები, "ნაციონალური მოძრაობა", არახამიები, პოდოლიაკები, ერმაკები და ა.შ. თუ ვინმეს შენიშვნა ეკუთვნის, კარგი იქნება სწორი აქცენტები დაისვას. ისინი უთმობენ დიდ დროს სანქციების თემას, ჩვენი ღირსეული მოქალაქის და ქვეყნის მისამართით. ასე რომ, კარგი იქნება თუ ქალბატონი დეგნანი ფოკუსირებული იქნება რეალურ ავტორებზე, ვინც ამ სანქციებზე დღე და ღამ საუბრობს,"- განაცხადა ზარქუამ.

საქართველოში ამერიკის შეერთებული შტატების ელჩი კელი დეგნანი ყოფილ პრემიერ-მინისტრ ბიძინა ივანიშვილთან შეხვედრის შინაარსთან დაკავშირებულ საკითხზე პირველ განცხადებას „ინტერპრესნიუსთან“ ექსკლუზიურ ინტერვიუში აკეთებს.

ინტერვიუში კელი დეგნანი ირწმუნება, რომ ბიძინა ივანიშვილთან შეხვედრაზე არ ყოფილა საუბარი „საქართველოს ჩართვაზე უკრაინის წინააღმდეგ რუსეთის ომში“, ან შანტაჟზე, ან მოქმედებაზე, რაც უკავშირდება ივანიშვილისთვის ფულის გადარიცხვის შეფერხებას. მისივე თქმით, დასავლეთს არასდროს უცდია საქართველოს ომში ჩართვა და კიდევ უფრო შემაშფოთებელია, როცა ამ განცხადებებს მმართველი პარტიის წევრები ეხმაურებიან. "ისინი ცუდ სამსახურს უწევენ ქართველ ხალხს",- განაცხადა დეგნანმა.

ტექინსპექტირების ცენტრების კავშირის თავმჯდომარე - ტექინსპექტირების გაუვლელობისთვის ჯარიმები ძვირდება - პირველადი ჯარიმა 50 ლარი დარჩება, ყოველი შემდგომი დაჯარიმებისთვის კი თანხა გაიზრდება
ქართული პრესის მიმოხილვა 08.08.2022
თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
საქართველოში „ვებსტერის უნივერსიტეტის“ უცხოელი პროფესორების ვინაობა ცნობილია
BTU მსოფლიოს წამყვან კიბერუსაფრთხოების ორგანიზაციასთან თანამშრომლობას იწყებს
Fitch-მა "ლიბერთის" საკრედიტო რეიტინგის მოლოდინი "სტაბილურად" შეაფასა
„მოასწარი ზაფხული“ - ლიბერთის ახალი აქცია სამომხმარებლო სესხებზე დაიწყო