საგარეო უწყებასთან „ნაციონალური მოძრაობის“ ახალგაზრდული ფრთის წარმომადგენლებმა ბიჭვინთასთან დაკავშირებით საპროტესტო აქცია გამართეს
საქართველოს საგარეო საქმეთა სამინისტროსთან "ერთიანი ნაციონალური მოძრაობის" ახალგაზრდული ფრთის წარმომადგენლებმა აქცია გამართეს.
აქციის მონაწილეების განცხადებით, ისინი ოკუპირებულ აფხაზეთში არსებულ ვითარებას აპროტესტებენ, სადაც სოხუმის ე.წ. პარლამენტი ბიჭვინთის "სახელმწიფო აგარაკისა" და მიწების რუსეთის საკუთრებაში გადაცემას გეგმავს.
მათი თქმით, ასეთ ვითარებაში ხელისუფლების დუმილი დანაშაულია და ისინი საგარეო უწყებისგან შესაბამისი ნაბიჯების გადადგმას მოითხოვენ.
"მოვითხოვთ ხელისუფლებისგან გადადგან შესაბამისი ნაბიჯები და მოიქცნენ ისე როგორც ხელისუფლებას შეეფერება. ხელისუფლების დუმილი არის დანაშაული", - აცხადებს აქციის ერთ-ერთი მონაწილე.
აქციის მონაწილეები საგარეო საქმეთა სამინისტროსთან სპეციალური პლაკატებით იყვნენ მისული, წარწერებით: "აფხაზეთი საქართველოა"; "ილია დარჩიაშვილი გაიღვიძე"; "პუტინი კლავს".
