პარტია „ანა დოლიძე - ხალხისთვის“ მდივანი სამართლებრივ საკითხებში, კობა კობახიძე აცხადებს, რომ თუ გაირკვევა, რომ პარაგლაიდინგის ფედერაციამ შესაბამის უწყებებს კანონის მიღებასთან დაკავშირებით მართლაც მიმართა და მათ ეს არ გაითვალისწინეს, სისხლის სამართლის პასუხისმგებლობა უნდა დადგეს.
მისივე თქმით, საქართველოს პარლამენტი ვალდებულია, სიტუაციის დასარეგულირებლად შესაბამისი კანონი შეიმუშაოს.
„როგორც მოტოციკლის მართვას სჭირდება მართვის მოწმობა, თავისუფალი ფრენის შემთხვევაშიც აუცილებელია ლიცენზია, მით უმეტეს, იმის ფონზე, რომ ასეთი სპორტის სახეობები საქართველოში საკმაოდ მასშტაბური გახდა. ამის დასარეგულირებლად საჭიროა შესაბამისი კანონმდებლობა. საქართველოს პარლამენტი ვალდებულია შესაბამისი კანონი შეიმუშაოს, რათა ეს სიტუაცია დაარეგულიროს,“ - განაცხადა კობა კობახიძემ.
მისივე თქმით, საინტერესოა ისიც, თუ რამდენად იყო პარაპლანისტი ლიცენზირებული და იყო თუ არა შესაბამისი უსაფრთხოების ზომები მიღებული.
„ამ ფაქტზე აუცილებელია გამოძიება სისხლის სამართლის კოდექსის 251-ე მუხლის მესამე ნაწილით დაიწყოს, რაც უსაფრთხოების ზომებთან შეუსაბამო მომსახურებას გულისხმობს, რომელსაც ადამიანის გარდაცვალება მოჰყვა. პარაგლაიდინგის ფედერაცია ამბობს, რომ მათ შესაბამის უწყებებს კანონის შემოღებასთან დაკავშირებით მიმართეს, მაგრამ მათგან უკუკავშირის სახით ქმედებები არ მიუღიათ, ამიტომ, აუცილებლად გასარკვევია თუ კონკრეტულად ვის მიმართეს მათ და რატომ არ მიიღეს შესაბამისი ზომები პარაგლაიდინებთან დაკავშირებით. თუ გამოძიებით დადგინდება, რომ მათ ამ საკითხთან დაკავშირებით წარდგენილი წესების და რეგულაციების პროექტები ჰქონდათ და პარლამენტის სხდომაზე ეს საკითხები არ გაიტანეს, ამ ადამიანების სისხლის სამართლის პასუხისმგებლობა აუცილებლად უნდა დადგეს“, - აცხადებს კობა კობახიძე.