დავაკვირდეთ მოვლენების განვითარებას - ასე გამოეხმაურა „ქართული ოცნების“ ლიდერი, ირაკლი კობახიძე "ქართული ოცნებიდან" გასული დეპუტატების - სოზარ სუბარის, მიხეილ ყაველაშვილისა და დიმიტრი ხუნდაძის მიერ საზოგადოებრივი მოძრაობა „ხალხის ძალას“ დაფუძნებას.

ჟურნალისტების კითხვაზე, შესაძლებელია თუ არა რომ პოლიტიკურ პარტიად ჩამოყალიბდნენ კობახიძემ უპასუხა, რომ პარტიაზე კონკრეტული ანონსი არ ყოფილა.

„ეს არის მათი გადაწყვეტილება. ვნახოთ როგორ გაგრძელდება ეს მოვლენები. დავაკვირდეთ ამ მოვლენების განვითარებას. პარტიაზე ზოგადი საუბარია, არანაირი კონკრეტული ანონსი არ ყოფილა, აქედან გამომდინარე ნაადრევია საუბარი თუ როგორ გამოვა ასე თუ ის სუბიექტი საპარლამენტო არჩევნებზე“,- განაცხადა კობახიძემ.

შეგახსენებთ, "ქართული ოცნებიდან" გასულმა დეპუტატებმა საზოგადოებრივი მოძრაობა „ხალხის ძალა“ დააფუძნეს და არ გამორიცხავენ, რომ მოძრაობა პოლიტიკურ პარტიად გარდაიქმნას. აღნიშნულის შესახებ განცხადება დეპუტატმა სოზარ სუბარმა გაავრცელა და აღნიშნა, რომ საზოგადოებრივი მოძრაობა პოლიტიკურ პარტიად იმ შემთხვევაში შეიძლება გარდაიქმნას, თუ დაინახავენ, რომ "ხელისუფლება ომთან დაკავშირებულ წნეხს ვეღარ უძლებს".

მისივე თქმით, მოძრაობა პარლამენტარებს, საკრებულოს წევრებს და საზოგადოების სხვა წარმომადგენლებს გააერთიანებს.