მამუკა მდინარაძე - ბევრი ტურისტი კარგია, ჩვენ ტურისტებს ეროვნებით არ ვარჩევთ, ყველამ დაიმახსოვროს

ბევრი ტურისტი არის კარგი. ჩვენ ტურისტებს ეროვნებით არ ვარჩევთ, ეს ყველამ დაიმახსოვროს, - ასე შეაფასა „ქართული ოცნების“ ერთ-ერთმა ლიდერმა, მამუკა მდინარაძემ „საერთაშორისო გამჭვირვალობა-საქართველოს" მიერ გამოქვეყნებული კვლევა, რომლის თანახმად, გასულ წლებთან შედარებით, საქართველოს რუსეთზე ეკონომიკური დამოკიდებულება იზრდება.

როგორც მან ჟურნალისტებს განუცხადა, არცერთი მტკიცებულება არ არსებობს, რომ რუსეთის წინააღმდეგ დაწესებული სანქციების გვერდის ავლა ხდება.

„რაც შეეხება დამოკიდებულებას, არანაირი არსებითი ცვლილება არ არის, არც ტურისტი არ არის იმდენი, რომ საგანგაშო იყოს, თან ტურისტია. როდესაც „ფეიკები“ ვრცელდება იმასთან დაკავშირებით, რომ საქართველოს მოსახლეობის 10% უკვე არის რუსების სახით შემოსული, 10% არ არის, არის 7% და ისიც ტურისტული მიზნით, უმრავლესობა გასულია და ბევრად ნაკლებია, ვიდრე წინა წლებში. რუსიც შემოდის, უკრაინელიც, ყოფილი საბჭოთა ქვეყნებიდანაც, ევროპიდანაც და ეს ძალიან კარგია. ბევრი ტურისტი არის კარგი. ჩვენ ტურისტებს ეროვნებით არ ვარჩევთ, ეს ყველამ დაიმახსოვროს.

მეორე, ძალიანაც უნდათ, რომ ტურიზმი ჩავარდეს, ეკონომიკა ჩავარდეს და ა.შ, მათ შორის სანქციებთან დაკავშირებით ჩვენი მკაფიო პოზიცია გვაქვს- საქართველო არასდროს გახდება ე.წ. შავი ხვრელი, რომელზეც ჩემი კოლეგა, „ნაციონალური მოძრაობის“ ერთ-ერთი ლიდერი პარლამენტში საუბრობდა, რომელზეც უკრაინის ხელისუფლების ზოგიერთი წარმომადგენელი საუბრობდა. არავინ მიაყენოს საქართველოს შეურაცხყოფა, რომ ის როდისმე „შავი ხვრელი“ გახდება ან ახლა არის. მტკიცებულება ათასჯერ მოვითხოვეთ და რეალური განცხადების სახით პასუხი ვერასდროს დაგვიბრუნეს. არცერთი მტკიცებულება არ არსებობს, ასეთს ვერ მოიტანდნენ, სანქციების გვერდის ავლაც არ ხდება. საქართველო „შავი ხვრელი“ არ არის და არც არასდროს იქნება. ამის სურვილი შეიძლება ვიღაცებს აქვთ, რომ შემდეგ საქართველოს ხელისუფლებას „დაარტყან“ . საქართველოს „გაშავება“ უნდათ იმიტომ, რომ საქართველოს ხელისუფლება „გააშავონ“, მაგრამ ასეთი საქართველოში არ ხდება, თორემ ამის მილიონ მტკიცებულებას მოიტანდნენ. ერთი რამ არის მთავარი-ტურისტი, ეკონომიკა არის სხვა სფერო და ის სიბინძურე, რასაც ამ ქვეყანას აბრალებენ, აბსოლუტურად სხვა, ეს ერთმანეთისგან გავმიჯნოთ“,-განაცხადა მდინარაძემ.

ცნობისთვის, „საერთაშორისო გამჭვირვალობა-საქართველოს" მიერ გამოქვეყნებული კვლევის თანახმად, გასულ წლებთან შედარებით საქართველოს რუსეთზე ეკონომიკური დამოკიდებულება იზრდება, რაც ძირითადად ფულადი გზავნილების მატებითაა განპირობებული. კვლევის თანახმად, 2022 წლის იანვარ-ივნისში საქართველომ რუსეთიდან ფულადი გზავნილებით, ტურიზმით და საქონლის ექსპორტით დაახლოებით 1.2 მლრდ აშშ დოლარის შემოსავალი მიიღო, რაც 2021 წლის იანვარ-ივნისში რუსეთიდან ამავე წყაროებით მიღებულ შემოსავალზე 2.5-ჯერ მეტია.

გიორგი ბილანიშვილი - ჩვენი სტრატეგიული პარტნიორებისგან განსხვავებით, მოსკოვი ნამდვილად არ უნდა იყოს უკმაყოფილო იმით, რაც ახლა საქართველოში ხდება
ქართული პრესის მიმოხილვა 04.08.2022
ხათუნა ბურკაძე - აგვისტოს ომიდან 14 წლის განმავლობაში რუსეთის უცვლელი, უკიდურესად აგრესიული პოლიტიკის შესაჩერებლად საერთაშორისო სისტემის გარდაქმნაა აუცილებელი
სოფიო გრაკალიშვილი  - საქართველოს სადაზღვევო ჯგუფის სურვილია მომხმარებელმა ყველაფერი იცოდეს დაზღვევის პირობების შესახებ და საინფორმაციო ფურცელზე ხელმოწერა არ იყოს ფორმალური პროცედურა
„ფინანსთა მინისტრის გადაწყვეტილება ბიზნესის საუკეთესო ინტერესებზეა ორიენტირებული“ - ლოგისტიკური კომპანია საბაჟო დეპარტამენტის ნაბიჯს მიესალმება