ნებისმიერი პირი, რომელიც ოკუპაციის შესახებ კანონის დამრღვევი იქნება, არ აქვს მნიშვნელობა ვინ იქნება, რუსი, ბელარუსი, ამერიკელი, გერმანელი თუ ვინ, დაექვემდებარება სამართლებრივ რეაგირებას,- ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა რუსეთის მოქალაქეების ქვეყანაში შემოსვლასთან დაკავშირებით განაცხადა.

კითხვაზე: „არ გიყვარდეს ოკუპანტი, მათთვის პრობლემაა თუ არა“, ოხანაშვილი აცხადებს, რომ თუ ვინმე „ოკუპაციის შესახებ“ კანონს დაარღვევს, რეაგირება იქნება, თუმცა არ არის სწორი, რომ ადამიანები კონკრეტული ნიშნის მიხედვით დავყოთ.

„ყველა შესაბამისი უწყება მუშაობს 24-საათიან რეჟიმში, რომ ჩვენი მოქალაქეების უსაფრთხოება და მშვიდობა იყოს გარანტირებული, ყველაფერი სხვა არ არის ჩვენი ქვეყნის ინტერესებში, არ არის სწორი მიდგომა, როცა ადამიანებს ყოფ კონკრეტული ნიშნის მიხედვით. თუ ვინმემ დაარღვია „ოკუპაციის შესახებ“ კანონი, რა თქმა უნდა, იქნება რეაგირება და უნდა იყოს. თუ ვინმე რაიმე ქმედებას განახორციელებს, ამაზეც საჭიროა რეაგირება და ისიც უნდა გვახსოვდეს, რომ არ არის საჭირო საზოგადოებაში გაღვივება აღქმის და არა ფაქტის, რომ თურმე უკონტროლოდ ხორციელდება ვინმეს შემოსვლა და არ ხდება რეაგირება, თუ ამის საჭიროება არსებობს,“ - განაცხადა ოხანაშვილმა.