ლევან ბეჟაშვილი - ხელისუფლება ოპოზიციას კი არ უნდა აბრალებდეს ქსენოფობიას, არამედ ქვეყანას უნდა მართავდეს

შექმნილი ვითარება პრაქტიკულად წარმოუდგენელია და ამ ვითარების შექმნაში ლომის წილი მიუძღვის „ქართული ოცნების“ ხელისუფლებას, იმიტომ რომ მათ არ აქვთ ჩამოყალიბებული მკაცრი, გამართული და გააზრებული პოლიტიკა რუსეთიდან მიგრანტებთან დაკავშირებით, - ასე გამოეხმაურა „ნაციონალური მოძრაობის“ დეპუტატი, ლევან ბეჟაშვილი „ქართული ოცნების“ თავმჯდომარის ირაკლი კობახიძის განცხადებას, რომ რუსეთის მოქალაქეების წინააღმდეგ ქსენოფობიური და შოვინისტური კამპანია მიმდინარეობს.

ბეჟაშვილის თქმით, ქვეყანაში ქსენოფობია არ არის პრობლემა, პრობლემაა რუსეთის ფედერაციიდან შემოსული უპრეცედენტო ნაკადი.

მისივე შეფასებით, მთავრობას საქართველოში შემოსულ რუსეთის მოქალაქეებთან დაკავშირებით სტრატეგია და პოლიტიკა უნდა ჰქონდეს შემუშავებული.

„შექმნილი ვითარება პრაქტიკულად წარმოუდგენელია და ამ ვითარების შექმნაში ლომის წილი მიუძღვის „ქართული ოცნების“ ხელისუფლებას, იმიტომ რომ მათ არ აქვთ ჩამოყალიბებული მკაცრი, გამართული და გააზრებული პოლიტიკა რუსეთიდან მიგრანტებთან დაკავშირებით. პრაქტიკულად, ის განუკითხაობა, რომელიც დღეს შექმნილია საქართველოში, სწორედ ამ პოლიტიკის არქონის გამოა. ქვეყანაში ქსენოფობია ნამდვილად არ არის პრობლემა, მაგრამ პრობლემაა რუსეთის ფედერაციიდან შემოსული უპრეცედენტო ნაკადი, მათ ტურისტებს ნამდვილად ვერ დავუძახებ. მათ შემოსვლას უკავშირდება კონკრეტული საფრთხეები, ფულად საკრედიტო სტაბილურობის, ინფლაციის, უძრავ ქონებასთან დაკავშირებული და სხვა უამრავი საკითხები, რომელიც ჩვენი მოსახლეობის აღშფოთებას და შიშს იწვევს, ამიტომ ხელისუფლება ოპოზიციას კი არ უნდა აბრალებდეს ქსენოფობიას, არამედ ქვეყანას უნდა მმართავდეს“,- განაცხადა ბეჟაშვილმა.

“ქართული ოცნება - დემოკრატიული საქართველოს“ თავმჯდომარემ, ირაკლი კობახიძემ ბრიფინგზე განაცხადა, რომ ქსენოფობიური კამპანიის ავტორებსა და გამავრცელებლებს ჭეშმარიტ ქართულ და ევროპულ ფასეულობებთან საერთო არაფერი აქვთ. ქსენოფობია და შოვინიზმი არასოდეს ყოფილა და არც არასდროს იქნება ქართული კულტურის ნაწილი.

მისივე განცხადებით, „ქართული ოცნება“ გმობს ქსენოფობიურ კამპანიას, რომელიც უხეშად ეწინააღმდეგება საქართველოს კონსტიტუციას და საერთაშორისო სამართლებრივ აქტებს ადამიანის ძირითადი უფლებებისა და თავისუფლებების სფეროში.

ზურაბ ბატიაშვილი - საქართველოს მთავარი პრობლემა იმაშია, რომ საბჭოთა კავშირი იურიდიულად 31 წლის წინ კი დაიშალა, მაგრამ მენტალური საბჭოთა კავშირი ისევ აქაა და არსად წასულა
ქართული პრესის მიმოხილვა 15.08.2022
ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს
უკრაინულმა კრიპტოვალუტის ბირჟამ WhiteBIT საკუთარი ტოკენის გაშვების შესახებ გამოაცხადა
ბაზისბანკის ფინანსური ჩართულობით, ახალგაზრდობის საერთაშორისო დღისადმი მიძღვნილი კონკურსის ფინალური შეხვედრა გაიმართა