დეოლიგარქიზაციის უკრაინული მოდელი, რომელზეც "ქართული ოცნება" აპელირებს, არანაირად არ შეესატყვისება ქართულ რეალობას - ჩვენ უნდა შევქმნათ ქართული მოდელი,- ამის შესახებ "ნაციონალური მოძრაობის" დეპუტატმა ლევან ბეჟაშვილმა ოპოზიციონერი დეპუტატების შეხვედრის დასრულების შემდეგ ჟურნალისტებთან განაცხადა.
როგორც ბეჟაშვილმა აღნიშნა, ოლიგარქის ცნების განსაზღვრებისთვის იქნება მისი ქონების ოდენობა, რომელიც მშპ-ს 1 პროცენტს უნდა აღემატებოდეს, ასევე მედიაზე კონტროლის და სახელისუფლებო ბერკეტებზე ზეგავლენის კომპონენტები.
"ბიძინა ივანიშვილი ქვეყნის მშპ-ს 30 პროცენტს ფლობს, სახელისუფლებო ბერკეტებზე უშუალო გავლენა აქვს კონკრეტული თანამდებობის პირების დანიშვნით და ა.შ. ჩვენ უნდა შევქმნათ ქართული მოდელი, რომელიც შეესატყვისება საქართველოს რეალობას. განმსაზღვრელი უნდა იყოს ოლიგარქის ცნებისთვის, რომ პირი უნდა ფლობდეს მშპ- ს დაახლოებით 1 პროცენტზე მეტს, მნიშვნელოვანია მედიაზე კონტროლის ნაწილი და სახელისფლებო ბერკეტებზე ზეგავლენა, რაც თვალსაჩინოა, რადგან ივანიშვილთან მომუშავე კონკრეტული პირები არიან პრემიერ-მინისტრი, უშიშროების სამსახურის ხელმძღვანელი, შს მინისტრი და ა.შ. ამ გავლენების დადგენა მარტივი საქმეა. მოლოდინი იმისა, რომ "ქართულ ოცნებას" გონება გაუნათდება და ისინი თავად დაადგენენ ივანიშვილთან მიმართებით ოლიგარქის ცნების შესატყვისობას, არ არსებობს, ამიტომ ალტერნატიული მექანიზმები უნდა გაიწეროს, თუ როგორ მოხდება კანონის აღსრულება",- განაცხადა ბეჟაშვილმა.
ცნობისათვის, "ლელოს", "სტრატეგია აღმაშენებლის" და "ნაციონალური მოძრაობის" დეპუტატებმა დღეს შეხვედრა დეოლიგარქიზაციის საკითხთან დაკავშირებით გამართეს, რომელიც ევროკავშირის რეკომენდაციათაგან ერთ-ერთია.