ილია დარჩიაშვილს გერმანიის ელჩმა რწმუნებათა სიგელების ასლები გადასცა

საქართველოს საგარეო საქმეთა მინისტრს, ილია დარჩიაშვილს გერმანიის ფედერაციული რესპუბლიკის დანიშნულმა ელჩმა საქართველოში პეტერ ფიშერმა რწმუნებათა სიგელების ასლები გადასცა. ამის შესახებ ინფორმაციას საქართველოს საგარეო საქმეთა სამინისტრო ავრცელებს.

უწყების ცნობით, რწმუნებათა სიგელების ასლების გადაცემის ცერემონიის შემდეგ გამართულ შეხვედრაზე მინისტრმა მიულოცა ელჩს თანამდებობაზე დანიშვნა და მომავალ საქმიანობაში წარმატებები უსურვა.

„შეხვედრაზე კმაყოფილებით აღინიშნა, რომ საქართველო და გერმანია ახლო მეგობრები და სანდო პარტნიორები არიან და ქვეყნებს შორის ტრადიციულად მეგობრული ურთიერთობები მტკიცე ისტორიულ საფუძველსა და საერთო ღირებულებებს ეფუძნება. მინისტრმა და ელჩმა დადებითად შეაფასეს ჩამოყალიბებული მრავალგანზომილებიანი თანამშრომლობა, რომელიც მოიცავს თითქმის ყველა სფეროს და მტკიცე ხალხთაშორის და კულტურულ კავშირებს.

მხარეებმა ისაუბრეს ორმხრივი ურთიერთობების დინამიკურ დღის წესრიგსა და სამომავლო გეგმებზე. ყურადღება გამახვილდა უახლოეს მომავალში დაგეგმილ უმაღლესი და მაღალი დონის ვიზიტების მნიშვნელობაზე როგორც აღმასრულებელი, ისე საკანონმდებლო წარმომადგენლების მხრიდან. ორ ქვეყანას შორის არსებული ეკონომიკური კავშირების განხილვისას, დადებითად შეფასდა ის ფაქტი, რომ გერმანია ტრადიციულად ჩვენი ქვეყნის ერთი-ერთი მთავარი სავაჭრო პარტნიორია. მხარეებმა გაცვალეს მოსაზრებები გერმანული ბიზნესის საქართველოთი კიდევ უფრო დაინტერესების გზებზე, როგორც საინვესტიციო, ისე ლოგისტიკურ ჭრილში.

რეგიონში შეცვლილი უსაფრთხოების გარემოსა და საერთაშორისო დღის წესრიგში არსებული გამოწვევების ფონზე, ხაზი გაესვა საქართველოს სუვერენიტეტისა და ტერიტორიული მთლიანობის და საქართველოს საგარეო-პოლიტიკური პრიორიტეტების მიმართ პარტნიორების მტკიცე პოლიტიკური მხარდაჭერის მნიშვნელობას.

განსაკუთრებული ყურადღება დაეთმო საქართველოსთვის ევროპული პერსპექტივის მინიჭების გადაწყვეტილებას და აღინიშნა საქართველოს შეუქცევადი წინსვლა ევროპული და ევრო-ატლანტიკური ინტეგრაციის გზაზე. მინისტრმა გერმანიის ელჩს გააცნო ევროპული ინტეგრაციის მიმდინარე დღის წესრიგი და საქართველოს მხრიდან როგორც ასოცირების დღის წესრიგით გათვალისწინებული ვალდებულებების, ისე ევროკომისიის რეკომენდაციების შესრულების მხრივ არსებული პროგრესი.

გერმანიის დანიშნულმა ელჩმა კიდევ ერთხელ დაადასტურა გერმანიის ურყევი მხარდაჭერა საქართველოს ტერიტორიული მთლიანობისა და სუვერენიტეტის, ასევე ევროპული და ევრო-ატლანტიკური ინტეგრაციის მიმართ და გამოხატა მზაობა, ორ ქვეყანას შორის ურთიერთობების კიდევ უფრო განმტკიცების თაობაზე“, - ნათქვამია ინფორმაციაში.

ირაკლი მელაშვილი - დასავლური კურსი დეკლარირებული გვაქვს, მაგრამ ხელისუფლებას მკაფიოდ აქვს გასაცემი პასუხი კითხვაზე - რატომ ამბობს საქართველო უარს დასავლეთის სამხედრო დახმარებაზე
ქართული პრესის მიმოხილვა 03.10.2022
ბორის სოკოლოვი - პუტინს ნებისმიერ ფასად უნდა ომში გამარჯვება, ამაზეა დამოკიდებული მისი პოლიტიკური მომავალი და ფიზიკურად გადარჩენაც, მაგრამ არ ვარ დარწმუნებული, რომ იგი მზადაა, გამოიყენოს თუნდაც ტაქტიკური ბირთვული იარაღი
ქართული ციფრული ბანკების გლობალური აღიარება
ვოლტი ზუგდიდშია