„ქართული ოცნება“ თვლის, რომ ყველა ტყუის სამყაროში მის გარდა, ზოგადად ასეთი დამოკიდებულების მქონე ნებისმიერი სუბიექტი, მათ შორის, პოლიტიკური ორგანიზაცია, მხოლოდ და მხოლოდ ლპობისთვის არის განწირული,- ამის შესახებ პარტია "საქართველოსთვის" წევრმა ანა ბუჩუკურმა ე.წ. მოსმენების კანონზე აშშ-ის საელჩოს განცხადების კომენტირებისას განაცხადა.

მისი თქმით, აშშ-ის საელჩოს ეს განცხადება ე.წ. მოსმენების კანონზე არ გაკვირვებია, რადგან ეს არის ერთ-ერთი მძიმე კანონი, რაც "ქართულმა ოცნებამ" ბოლო თვეების განმავლობაში მიიღო.

"ამ კანონთან დაკავშირებით, გარდა ოპოზიციისა, იყო დიდი წინააღმდეგობა არასამთავრობო სექტორის მხრიდან, ვენეციის კომისიის დასკვნაც ვიხილეთ, ეს ის პირველი შემთხვევა იყო, რომელზეც სალომე ზურაბიშვილმა ვეტო გამოიყენა, სამწუხაროდ, ვეტო დაძლია "ქართულმა ოცნებამ" და ვიხილეთ მთავარი სტრატეგიული პარტნიორის აშშ-ის საელჩოს ოფიციალური განცხადებაც. "ქართული ოცნება" თვლის, რომ ყველა ტყუის სამყაროში "ქართული ოცნების" გარდა, ზოგადად ასეთი დამოკიდებულების მქონე ნებისმიერი სუბიექტი, მათ შორის, პოლიტიკური ორგანიზაცია მხოლოდ და მხოლოდ ლპობისთვის არის განწირული",-განაცხადა ბუჩუკურმა.

ცნობისათვის, აშშ-ის საელჩომ განცხადება გაავრცელა, სადაც აღნიშულია, რომ ე.წ. მოსმენების შესახებ კანონი საქართველოს აშორებს ევროპულ ინტეგრაციას, ნაცვლად მასთან დაახლოებისა.