ოპოზიციას მხოლოდ დემაგოგიური და უსაფუძვლო განცხადებები ახასიათებს,- ამის შესახებ საპარლამენტო უმრავლესობის წევრმა გიორგი კახიანმა ჟურნალისტებთან განაცხადა, რითაც "საერთო სასამართლოების შესახებ" კანონში ცვლილებებზე ოპოზიციის განცხადებას გამოეხმაურა.
კახიანი მიიჩნევს, რომ "საერთო სასამართლოების შესახებ" კანონში ყველა ცვლილება მიმართულია იმისკენ, რომ კანონმდებლობა სრულყოფილი იყოს.
„რა თქმა უნდა, რეფორმები მომავალშიც გაგრძელდება, მაგრამ თუ ოპოზიცია ფიქრობს, რომ კანონმდებლობაში რაიმე არაკონსტიტუციურია, კეთილი ინებოს და საკონსტიტუციო სასამართლოს მიმართოს. რასაც ვხედავთ, მათ მხოლოდ დემაგოგიური და უსაფუძვლო განცხადებები ახასიათებთ, ქმედებებით არაფერს აკეთებენ. მათ აქვთ შესაძლებლობა, რომ საკონსტიტუციო სასამართლოს მიმართონ, რომელიც კანონის კონსტიტუციურობაზე იმსჯელებს. თუ მიმართავენ, სასამართლო იტყვის თავის გადაწყვეტილებას. დარწმუნებული ვარ, კანონმდებლობაში არაკონსტიტუციურობის საკითხი არ არის",- განაცხადა კახიანმა.
ცნობისათვის, საპარლამენტო ოპოზიცია გასული წლის დეკემბერში "საერთო სასამართლოების შესახებ" კანონში მიღებულ ცვლილებებს საკონსტიტუციო სასამართლოში ასაჩივრებს. საპარლამენტო ოპოზიციის წევრების განმარტებით, ცვლილებები არღვევს მოსამართლეთა კონსტიტუციურ უფლებებს, ზღუდავს ინდივიდუალურ მოსამართლეთა დამოუკიდებლობის გარანტიებს და სასამართლოს მმართველ გავლენიან ჯგუფს უზრდის ბერკეტებს, შეავიწროვოს და გავლენა მოახდინოს ინდივიდუალურ მოსამართლეებზე.