დიდი ალბათობით, უკრაინა ამ ომს მსოფლიოში ერთ - ერთი უძლიერესი არმიით დაასრულებს. მისი პოლიტიკური წონა პოსტომის სამყაროში საგრძნობლად დიდი იქნება - ამის შესახებ პარტია “ევროპელი დემოკრატების“ პოლიტიკური საბჭოს თავმჯდომარემ ნიკოლოზ ვაშაკიძემ განაცხადა.
მისი თქმით, უკრაინა საერთაშორისო ურთიერთობებში საკმაოდ ხისტი იქნება, რასაც, უკვე დღესაც ავლენს.
„უკრაინა განსაკუთრებით ხისტი იქნება იმ ქვეყნების მიმართ, რომლებმაც ამ ომში მის მიმართ მტრული ან ორაზროვანი პოზიცია გამოავლინა. ცხადია, დიდი და ძლიერი სახელმწიფოების მიმართ წყენას ის სწრაფად და პრაგმატულად დაივიწყებს. პატარა და სუსტ ქვეყნებს პრობლემები შეექმნებათ. აქედან გამომდინარე, დიდი მნიშვნელობა აქვს ქართველი ხალხმა, რომელმაც ამ ომში არაერთხელ მკაფიოდ გამოხატა თავისი სოლიდარობა უკრაინელი ხალხის მიმართ, ომის დამთავრებამდე შეძლოს ხელისუფლების შეცვლა. რამდენად გამოვა ეს, ძნელი სათქმელია, მაგრამ დროა ჩვენი საზოგადოება დაფიქრდეს ამაზე“, - აცხადებს ნიკოლოზ ვაშაკიძე, რომლის კომენტარსაც პარტიის პრესსამსახური ავრცელებს.