მუნიციპალური სერვისების რეფორმის ფარგლებში, რუსთავში მოქალაქეთა მომსახურების ახალი ცენტრი შენდება. აღნიშნულ ინფორმაციას რუსთავის მერია ავრცელებს.

მუნიციპალური სერვისების ხელმისაწვდომობის გაუმჯობესების მიზნით მიმდინარე პროექტი უკვე აქტიურ ფაზაშია. მშენებლობის პროცესს ქალაქის მერი, ნინო ლაცაბიძე, ინფრასტრუქტურის სამსახურის წარმომადგენლებთან და რუსთავის საკრებულოს ფრაქცია „ქართული ოცნების“ წევრებთან ერთად ადგილზე გაეცნო.

„მუნიციპალური სერვისების გაუმჯობესების ნიზნით მიმდინარე რეფორმის ძალიან მნიშვნელოვანი ნაწილია ახალი სერვისცენტრის მშენებლობა. პროექტის განხორციელების შემდეგ, რუსთაველებს შესაძლებლობა ექნებათ უფრო მოქნილი და თანამედროვე მომსახურება მიიღონ ქალაქის მერიისგან“, - განაცხადა რუსთავის მერმა ნინო ლაცაბიძემ.

რუსთავის მერიის ცნობით, თანამედროვე სტანდარტების შესაბამისი, 430 კვადრატული მეტრი ფართობის ერთსართულიანი შენობა, მეგობრობის გამზირზე შენდება. მშენებლობის დასრულების შემდეგ, რუსთავის მერიის მუნიციპალური სერვისების მიღებას, მოქალაქეები ახალი სერვისცენტრიდან შეძლებენ. როგორც რუსთავის საკრებულოს ფრაქცია „ქართული ოცნების“ წევრმა თამარ გოგაძემ განაცხადა, მუნიციპალური სერვისების რეფორმა, მნიშვნელოვანია, რადგან რუსთაველები უფრო მოსახერხებელ და თანამედროვე მომსახურებას მიიღებენ ქალაქის მერიისგან.

მუნიციპალური სერვისების რეფორმა, რუსთავში მიმდინარე წლის იანვრიდან დაიწყო. არქიტექტურის სამსახურის, მუნიციპალური ინსპექციის და დასუფთავების სამსახურის შემდეგ, რეფორმა მოქალაქეთა მომსახურების პროფილის სამსახურებშიც დაიწყო. რეფორმის ერთ-ერთი ეტაპი, მუნიციპალური სერვისების ერთ სივრცეში მოქცევას და მოქალაქეებისთვის კომფორტული და თანამედროვე გარემოს შექმნას ითვალისწინებს.