ეროვნული დემოკრატიული ინსტიტუტის (NDI) მიერ გამოკითხული მოსახლეობის უმრავლესობა ფიქრობს, რომ პარლამენტი მოსახლეობის საჭიროებებს არ პასუხობს.

აღნიშნულ კონტექსტში გამოკითხულმა პირებმა რამდენიმე მოსაზრებაზე დააფიქსირეს პოზიცია.

მოსაზრებას - „პარლამენტის წევრს თუ ჩემს დასახლებაში არსებული პრობლემების შესახებ ვეტყვი, ის გადადგამს ნაბიჯებს პრობლემების მოსაგვარებლად“, მხოლოდ 36% ეთანხმება, 54% არ ეთანხმება, 10% კი ამბობს, რომ პასუხი არ იცის.

მოსაზრებას - „პარლამენტი ამტკიცებს კანონებს ჩემთვის მნიშვნელოვანი საკითხების შესახებ“, 36% ეთანხმება, 56% არ ეთანხმება, ხოლო 8%-მა პასუხი არ იცის.

კიდევ ერთ მოსაზრებაზე, რომ „პარლამენტი ეფექტურად უწევს ზედამხედველობას მთავრობის (სამინისტროების) საქმიანობას“, გამოკითხულთა 33% ამბობს, რომ ეთანხმება, 45% არ ეთანხმება, 22% პასუხობს, რომ არ იცის, 1% კი პასუხზე უარს აცხადებს.

მოსაზრებას, რომ „პარლამენტი რეგულარულად ეკონტაქტება მოქალაქეებს“, გამოკითხულთა მხოლოდ 27% ეთანხმება, 65% არ ეთანხმება, 8%-მა პასუხი არ იცის.

ეროვნულ-დემოკრატიული ინსტიტუტისა და CRRC-საქართველოს მიერ გამოქვეყნებული ანგარიში 14 ივლისიდან - 15 აგვისტომდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით). აგვისტოში ჩატარებული გამოკითხვა სულ 2,104 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 2 პროცენტია.