ირაკლი კობახიძის განცხადებით, "მაუწყებლობის შესახებ" კანონის მიღება ევროკავშირის მოთხოვნაა და მას თუ არ მიიღებენ, ქვეყანა ერთ-ერთი ევროპული ორგანიზაციიდან შეიძლება გარიცხონ
"მაუწყებლობის შესახებ" კანონის მიღება არის ევროკავშირის მოთხოვნა - მეორე მოსმენამდე ევროკავშირის სტრუქტურებთან კონსულტაციები გვექნება და საბოლოოდ კანონპროექტი კონსულტაციების საფუძველზე ჩამოყალიბდება,- ამის შესახებ პარტია "ქართული ოცნების" თავმჯდომარე ირაკლი კობახიძემ განაცხადა.
კობახიძე აცხადებს, რომ კანონპროექტში სიძულვილის ენის განმარტება მაქსიმალურად რბილად არის ჩამოყალიბებული.
"ამ კანონპროექტის მიღება არის პირდაპირ ევროკავშირის ერთ- ერთი მოთხოვნა, სიძულვილის ენის რეგულირება არის პირდაპირი მოთხოვნა. თვის ბოლომდე, ამას თუ არ მივყვებით პირველი მოსმენით, ერთ-ერთი ევროპული ორგანიზაციიდან ქვეყანა შეიძლება გარიცხონ. მათი მოთხოვნაა, რომ ეს კანონი მივიღოთ. გვავალებენ და ვაკეთებთ,"- განაცხადა კობახიძემ.
კითხვაზე, მედიათავისუფლებას როგორ უწყობს ხელს ეს კანონი, როცა მარეგულირებელს შეეძლება მედიის დაჯარიმება იმ ეტაპზე, რომელზეც სასამართლო გადაწყვეტილება მიღებული არ იქნება, კობახიძე პასუხობს - "ეს კითხვა დაუსვით ევროკავშირს".
კითხვაზე, რამდენად ითხოვს ევროკავშირი სწორედ ამ ფორმით კანონპროექტის მიღებას და რამდენად არის მაგალითად, ევროკავშირის მოთხოვნა ის, რომ კანონში ჩაიწეროს "პასუხის უფლება", რაზეც მისი პასუხია, რომ კონსულტაციები გაგრძელდება ევროკავშირის წარმომადგენლებთან და "ნუ ვიჩქარებთ".
"პირველი მოსმენით მიიღება ეს კანონპროექტი დღეს. განსაკუთრებით მეორე მოსმენით მიღებამდე გვექნება ინტენსიური კონსულტაციები ევროკავშირის სტრუქტურებთან. საბოლოოდ კანონპროექტი სწორედ ამ კონსულტაციების საფუძველზე ჩამოყალიბდება. ასე რომ, ნუ იჩქარებთ, დაელოდეთ პროცესს. ამ შემთხვევაში ჩვენ გვაქვს ძალიან ვიწრო ამოცანა, ეს არის ევროკავშირის მოთხოვნის შესრულება და გავყვებით ამას, კონსულტაციები იქნება და რაზეც შევჯერდებით, იმას მივუთითებთ. თუ ვიღაც არის მედიაექსპერტი, იმასთანაც გვექნება კონსულტაციები,"- განაცხადა კობახიძემ.
