ვფიქრობ, საგამოძიებო კომისიის შექმნა ერთადერთ მიზანს ემსახურება: ყურადღება გადაიტანონ კომისიების საქმიანობაზე და შექმნან იმიჯი, რომ გარკვეულ პროცესებს კონკრეტული პოლიტიკური ძალები მართავენ - მე არ ვარ ამის მომხრე, რომ ამას ხელშეწყობა ჰქონდეს,- ამის შესახებ ჟურნალისტებთან პარლამენტის პირველმა ვიცე- სპიკერმა გია ვოლსკიმ განაცხადა, რითაც საქართველო-რუსეთის სპეცსამსახურების შესაძლო თანამშრომლობის თაობაზე საგამოძიებო კომისიის დარეგისტრირებას გამოეხმაურა.
მისი შეფასებით, კომისია იქნება ერთ-ერთი რესურსი ოპოზიციისთვის, რომ პოლარიზაციას ხელი შეუწყოს.
"დამატებითი ინფორმაცია თუ გააჩნია ვინმეს, რაიმე გადაცდომის თაობაზე, ამისთვის არ არის აუცილებელი, საგამოძიებო კომისია შეიქმნას. მე ამის წინააღმდეგი ვიყავი. არ მომწონს იდეა. ამ საკითხზე არსებობს პროცედურა. პროცედურის სრული დაცვით როგორ მოვიქცევით, ჯერ პოზიცია არ გვაქვს. რაც შეეხება ჩემს დამოკიდებულებას კომისიის მიმართ, კატეგორიულად ნეგატიურია და ვფიქრობ, ეს არის ერთ- ერთი რესურსი იმისთვის, რომ დესტაბილიზაციას, შეუთანხმებლობას შეუწყონ ხელი," - განაცხადა ვოლსკიმ.
კითხვაზე, იქნება თუ არა საბოტაჟი, თუკი კონკრეტულ თანამდებობის პირს კომისია გამოკითხვაზე დაუბარებს, ის კი ამაზე უარს იტყვის, ვოლსკის თქმით, ამას საბოტაჟს არ დაარქმევდა და რეგლამენტის მიხედვით უნდა იმოქმედონ.
"საბოტაჟს ამას არ დავარქმევდი. არსებობს რეგლამენტი და უნდა ვიმოქმედოთ რეგლამენტის მიხედვით. თუ ასე განვითარდა პროცესი, რა საკვირველია, ხელი უნდა შევუწყოთ, მაგრამ თავად კომისიის შექმნა არის მავნებლური გადაწყვეტილება, რომელიც რატომღაც მიიღო გარკვეულმა პოლიტიკურმა ჯგუფებმა,"- განაცხადა ვოლსკიმ.