აფხაზეთის ომის დასრულებიდან თითქმის 30 წელი გავიდა და ჩვენ ქვეყნის გაერთიანებისაკენ ერთი რეალური ნაბიჯიც კი არ გადაგვიდგამს - სხვის იმედად კი არ უნდა ვიყოთ ჩვენი ქვეყნის გამთლიანების საკითხის გადაწყვეტაში, არამედ ჩვენ უნდა გადავდგათ ნაბიჯები, - ამის შესახებ "ერთიანი საქართველოს" ლიდერმა, ნინო ბურჯანაძემ გმირთა მემორიალთან, ჟურნალისტებთან საუბრისას განაცხადა.
ნინო ბურჯანაძემ იმედი გამოთქვა, რომ რეალობა შეიცვლება და ქვეყნის გამთლიანებას შევძლებთ.
"სხვის იმედად კი არ უნდა ვიყოთ ჩვენი ქვეყნის პრობლემების მოგვარებაში და ჩვენი ქვეყნის გამთლიანების საკითხის გადაწყვეტაში, არამედ ჩვენ უნდა გადავდგათ ნაბიჯები. ვიდრე იმის იმედად ვიქნებით, რომ სხვაგან ვინმე რამეს გააკეთებს და ჩვენი პრობლემები მოგვარდება, ყოველ წელს მოვალთ ასე გულგახეთქილები, ერთმანეთს გავახსენებთ, რომ ჩვენი ქვეყნის ნაწილი იყო და გვინდა, რომ იყოს აფხაზეთი და სამაჩაბლო, მაგრამ ნაბიჯებს ვერ გადავდგამთ. იმედია, რომ რეალობა შეიცვლება და ჩვენ ქვეყნის და ხალხის გამთლიანებას შევძლებთ," - განაცხადა ნინო ბურჯანაძემ.