„შევიკრიბეთ და დავიშალეთ“ - ამის გაკეთებას არ ვაპირებთ, ვაპირებთ სახელმწიფო შენობების, სტრუქტურების პარალიზებას, მათ შორის შესვლას შენობებში, მათი მუშაობის პარალიზებას და რიგგარეშე არჩევნების მოთხოვნას, - ამის შესახებ „გირჩი-მეტი თავისუფლების“ ლიდერმა ზურაბ ჯაფარიძემ ტელეკომპანია „პალიტრანიუსის“ გადაცემა „პოლიტიკურ სივრცეში“ საკუთარ გეგმებთან დაკავშირებით განაცხადა.

კითხვაზე, როდის აპირებს აღნიშნული პროცესის დაწყებას, ჯაფარიძე ამბობს, რომ „როგორც კი ადამიანების რაოდენობა იქნება საკმარისი“.

„საბოლოოდ, გამარჯვების გზა გადის ქუჩაში, მრავალრიცხოვან პროტესტზე. ოღონდ არა „შევიკრიბე-დავიშალეზე“, არამედ ისეთ პროტესტზე, როდესაც ადამიანების რაოდენობა იმდენია, რომ ფიზიკურად შეუძლებელია ძალოვანმა სტრუქტურებმა წინააღმდეგობა გაუწიონ. ამ ადამიანებმა უნდა მოახდინონ სახელმწიფო სტრუქტურების პარალიზება და რიგგარეშე არჩევნების მოთხოვნა. გამარჯვება ამაზე გადის. ამ საქმით ვარ დაკავებული. ამაზე გულწრფელად ვესაუბრები ადამიანებს და ვთხოვ, რომ ამ პროცესში ჩაერთონ“,- განაცხადა ზურაბ ჯაფარიძემ.