უკრაინისთვის აშშ-ის უსაფრთხოების დახმარების მომდევნო პაკეტში ოთხი ერთეული მაღალი მობილობის საარტილერიო სარაკეტო სისტემა (HIMARS), საბრძოლო მასალები, ნაღმები და დაჯავშნული საბრძოლო მანქანები იქნება გათვალისწინებული, – ამის შესახებ ინფორმაციას Reuters-ი ავრცელებს.

სააგენტოს ცნობით, საუბარია 625 მილიონი დოლარის ღირებულების პაკეტზე, რომელიც სამშაბათს გამოცხადდება.

დახმარების ფარგლებში უკრაინაში, უახლოეს დღეებში შეიძლება გაიგზავნოს HIMARS-ის ოთხი გამშვები და მასთან დაკავშირებული რაკეტები, დაახლოებით 200 ერთეული MRAP-ის ჯავშანტექნიკა ჰაუბიცების საბრძოლო მასალა და ნაღმები.

ოფიციალურად ამის შესახებ განცხადება სავარაუდოდ სამშაბათს გაკეთდება. ეს რუსეთის მიერ უკრაინის კიდევ ოთხი ოლქის ანექსირების შემდეგ, პირველი დახმარების პაკეტი იქნება.