ბატონი მანჯგალაძე გამოვიდა მიგრაციასთან დაკავშირებით. სწორედ თქვენი ხელისუფლების დროს საქართველო დატოვა ყველაზე მეტმა მოქალაქემ, - ამის შესახებ „ქართული ოცნების“ და პარლამენტის ყოფილმა თავმჯდომარემ, არჩილ თალაკვაძემ პლენარულ სხდომაზე სიტყვით გამოსვლისას განაცხადა, რითაც გამოეხმაურა „სტრატეგია აღმაშენებლის“ დეპუტატის, პაატა მანჯგალაძის განცხადებას ბოლო პერიოდში ქვეყნიდან საქართველოს მოქალაქეთა მასიურ გასვლასთან დაკავშირებით.

თალაკვაძის შეფასებით, ხელისუფლებაში „ნაციონალური მოძრაობის“ ყოფნის დროს ქვეყანა საქართველოს იმაზე მეტმა მოქალაქემ დატოვა, ვიდრე დღევანდელ ვითარებაში.

„2011 წელს საქართველო 107 000-მა მოქალაქემ დატოვა, ხოლო 2010 წელს - 103 000-მა. მაშინ საქართველოს რომ ჰქონოდა უვიზო რეჟიმი ევროპასთან, მერწმუნეთ, რომ საქართველოში შუქის ჩამქრობიც არ დარჩებოდა. თქვენი ხელისუფლებისა და მართვის სტილის გამო ყველა წავიდოდა ამ ქვეყნიდან. დღეს ეს მაჩვენებელი არის ბევრად ნაკლები“, - განაცხადა არჩილ თალაკვაძემ.