გერმანია უკრაინას დამატებით PzH2000 თვითმავალ ჰაუბიცებსა და MARS II ზალპური ცეცხლის რეაქტიულ სისტემებს გადასცემს. ამის შესახებ გერმანიის თავდაცვის ფედერალური სამინისტრო Twitter-ის პირად გვერდზე წერს.

“რამშტაინის” ფორმატში შეხვედრა განსაკუთრებულ დროს მიმდინარეობს: რუსეთის სარაკეტო დარტყმები და ნაწილობრივი მობილიზაცია, ფსევდორეფერენდუმები და უკრაინის კონტრიერიში. ჩვენი მიმდინარე დახმარების კოორდინირებას ვახდენთ. უახლოეს რამდენიმე კვირაში უკრაინას გადაეცემა დამატებითი PzH2000 და MARS II”, - წერს გერმანიის თავდაცვის ფედერალური სამინისტრო.

შეიარაღების ზუსტი რაოდენობა არ არის დაკონკრეტებული.

ცნობისთვის, უკრაინას გერმანიისგან უკვე გადაეცა მინიმუმ 5 MARS II ზალპური ცეცხლის რეაქტიული სისტემა და რამდენიმე ათეული Panzerhaubitze 2000 ჰაუბიცა.