პარტიების მათემატიკური გაერთიანება შედეგის მომტანი არ იქნება - ჩვენ, როგორც დიდი ოპოზიციური პარტია, მივესალმებით პატარა პარტიების გაერთიანებას, მათთან თანამშრომლობას ვაპირებთ, - ამის შესახებ ჟურნალისტებთან „ნაციონალური მოძრაობის" დეპუტატმა ლევან ბეჟაშვილმა განაცხადა, რითაც „გირჩი - მეტი თავისუფლებას“, „სტრატეგია აღმაშენებლისა“ და „დროას" გაერთიანების შესახებ ინფორმაციას გამოეხმაურა და უპასუხა კითხვას გაერთიანებაში "ნაციონალური მოძრაობის" შესაძლო მონაწილეობის თაობაზე.
მისი თქმით, მნიშვნელოვანია, ყველა ოპოზიციური პარტია თავის ელექტორალურ სეგმენტზე მუშაობდეს.
„ერთიანი ნაციონალური მოძრაობა" როგორც მთავარი ოპოზიციური ძალა მიესალმება პატარა პარტიების გაერთიანებას, რადგან მნიშვნელოვანია იყოს სხვა ძლიერი პარტიებიც, ამიტომ ბუნებრივია ჩვენ მივესალმებით ამ გადაწყვეტილებას, ყველანაირად წავახალისებთ მათ გაერთიანებას და საერთო თანამშრომლობას, რომ მოვახდინოთ "ქართული ოცნების" დემონტაჟი.
ოპოზიციური პარტიების მათემატიკური გაერთიანება, ბუნებრივია შედეგის მომტანი არ იქნება, მნიშვნელოვანია, ყველა ოპოზიციური პარტია თავის ელექტორალურ სეგმენტზე მუშაობდეს. ჩვენ, როგორც დიდი ოპოზიციური პარტია მივესალმებით პატარა პარტიების გაერთიანებას, მათთან თანამშრომლობას ვაპირებთ, უნდა გვქონდეს საერთო სტრატეგია როგორ დავამარცხოთ ივანიშვილის და "ქართული ოცნების" ოლიგარქიული რეჟიმი, იმავდროულად ვიმუშაოთ ჩვენს ელექტორალურ სეგმენტზე და მოვახდინოთ მაქსიმალური მობილიზება და ჩართვა ამომრჩევლების პოლიტიკურ პროცესში,"- განაცხადა ბეჟაშვილმა.