შალვა პაპუაშვილი საქართველოში ევროკავშირის ელჩს პაველ ჰერჩინსკის შეხვდა. პარლამენტის პრესსამსახურის ინფორმაციით, მხარეებმა ევროკავშირის 12 რეკომენდაციის განხორციელების პროცესი დეტალურად მიმოიხილეს.

ასევე განიხილეს ევროკავშირის მოსაზრებები და მოლოდინები ამ მიმართულებით საქართველოს პროგრესთან დაკავშირებით.

“შალვა პაპუაშვილმა აღნიშნა, რომ საქართველოს პარლამენტი რეკომენდაციებზე მუშაობას წინასწარ გაწერილი გეგმის მიხედვით დაასრულებს. შეხვედრაზე შალვა პაპუაშვილმა და პაველ ჰერჩინსკიმ აგრეთვე ისაუბრეს ორმხრივი ურთიერთობების დღის წესრიგის სხვა საკითხებზე, მათ შორის ხაზი გაუსვეს უახლოეს მომავალში საქართველოში ევროკომისიის მაღალი დონის ვიზიტის მნიშვნელობას. ევროკავშირის ელჩმა აღნიშნა, რომ ევროკავშირის წარმომადგენლობა გააგრძელებს საქართველოს მხარდაჭერას რეკომენდაციების შესრულების პროცესში“, - ნათქვამია პარლამენტის პრესსამსახურის მიერ გავრცელებულ ინფორმაციაში.