დღევანდელი გადაწყვეტილება იყო ძალის დემონსტრირება. სწორედ იმის დემონსტრირება, რა კურსიც ივანიშვილის რეჟიმმა აიღო, - ამის შესახებ „ევროპული საქართველოს“ ლიდერმა, გიგა ბოკერიამ „მთავარი არხის“ გენერალური დირექტორის, ნიკა გვარამიას საქმის განაჩენის გამოცხადების შემდეგ განაცხადა.
„თუკი იყვნენ კიდევ წესიერი, პატიოსანი მოქალაქეები, რომლებსაც რაიმე ილუზია ჰქონდათ, რომ ამ რეჟიმის პირობებში შესაძლებელია ჩვენი ქვეყნის სწორ გზაზე დადგომა, თავისუფალ სამყაროში დაბრუნდება, დემოკრატიის ფუნდამენტური საკითხების მოგვარება, ეს ილუზია ყველამ უნდა მოისპოს. გვარამიას საქმე არის გამორჩეული. ყველას გვინდა პერსონალურად პოლიტიკური პატიმრის თავისუფლება, მაგრამ ამავე დროს ყველას გვესმის, რომ ზეგ რომ რეჟიმმა რაღაც ვაჭრობისთვის გვარამიას გათავისუფლების გადაწყვეტილება მიიღოს, ამითაც კი არ შეიცვლება ჩვენი დიდი ეროვნული პრობლემის არსი," - განაცხადა გიგა ბოკერიამ.
შეგახსენებთ, სააპელაციო სასამართლომ ნიკა გვარამია პატიმრობაში დატოვა.