საქართველოს შინაგან საქმეთა სამინისტროს მიერ, 2022 წლის იანვრიდან სექტემბრის ჩათვლით „ქურდულ სამყაროსთან“ დაკავშირებული სხვადასხვა დანაშაულისთვის პასუხისგებაში ჯამში 64 პირია მიცემული, მათ შორის შსს-ს დროებითი მოთავსების იზოლატორში 44 პირი შესახლდა.

როგორც „ინტერპრესნიუსს“ შინაგან საქმეთა სამინისტროდან გამოთხოვილი საჯარო ინფორმაციის პასუხად აცნობეს, 2022 წლის მეორე კვარტალში - 28, ხოლო მესამე კვარტალში 15 ადამიანი დააკავეს.

უფრო კონკრეტულად, საქართველოს შინაგან საქმეთა სამინისტროს მიერ, 2022 წლის მესამე კვარტლის მონაცემებით, სისხლის სამართლის 223¹ მუხლით, რაც „ქურდული სამყაროს“ წევრობას, „კანონიერ ქურდობას“ გულისხმობს, 5 პირია დაკავებული, მუხლი 223³ - „ქურდული სამყაროს“ საქმიანობის მხარდაჭერის“ ბრალდებით - 5 პირი, ხოლო მუხლი 223⁴ - „ქურდული სამყაროს“ წევრისთვის/„კანონიერი ქურდისთვის“ მიმართვა ან ამ მიმართვის შედეგად მატერიალური სარგებლის ან მატერიალური უპირატესობის მიღების ბრალდებით - 5.

რაც შეეხება მიმდინარე წლის მეორე კვარტლის მონაცემებს, სისხლის სამართლის კოდექსის მუხლი 223¹ - „ქურდული სამყაროს“ წევრობა, „კანონიერი ქურდობის“ ბრალდებით, 13 პირი იყო დაკავებული, მუხლი 223³ - „ქურდული სამყაროს“ საქმიანობის მხარდაჭერის“ ბრალდებით 6 პირი, ხოლო მუხლი 223⁴ - „ქურდული სამყაროს“ წევრისთვის/„კანონიერი ქურდისთვის“ მიმართვა ან ამ მიმართვის შედეგად მატერიალური სარგებლის ან მატერიალური უპირატესობის მიღების ბრალდებით - 10.

სააგენტოსთვის გამოგზავნილ ინფორმაციაში აღნიშნულია, რომ 2022 წლის იანვრიდან სექტემბრის ჩათვლით, უწყების მიერ სისხლის სამართლის კოდექსის 223² მუხლით, რაც „ქურდულ შეკრებაში“ მონაწილეობას გულისხმობს, არცერთი პირი არ დაუკავებიათ.

ასევე 2022 წლის პირველ კვარტალში (იანვარი-მარტი) „ქურდულ სამყაროსთან“ დაკავშირებული სხვადასხვა დანაშაულისთვის 3 პირის მიმართ დაიწყო სისხლის სამართლებრივი დევნა.

ცნობისთვის, შინაგან საქმეთა სამინისტროს ინფორმაციით, 2021 წლის განმავლობაში სისხლის სამართლის პასუხისგებაში მიცემულია 2 კანონიერი ქურდი, „ქურდულ სამყაროს“ წევრობის, მხარდაჭერისა და კანონიერი ქურდისთვის მიმართვის ბრალდებით დაკავებული და პასუხისგებაში მიეცა 93 პირი.